ទូរទស្សន៍រដ្ឋនៅប្រទេសអៀរឡង់ ហូឡង់ អេស្ប៉ាញ និងស្លូវេនី កាលពីថ្ងៃព្រហស្បតិ៍ (៤ ធ្នូ) បានប្រកាសពីការដកខ្លួនចេញពីកម្មវិធីប្រលងចម្រៀង Eurovision លំដាប់ថ្នាក់ពិភពលោក នៅឆ្នាំក្រោយនេះ បន្ទាប់ពីអ្នករៀបចំ បានសម្រេចចិត្តអនុញ្ញាតឱ្យអ៊ីស្រាអែល ចូលរួមប្រកួតប្រជែង នៅក្នុងជំហានមួយដែលបង្ហាញថា ជម្លោះនយោបាយដ៏ជូរចត់កំពុងតែលាតត្រដាងលើឆាកតន្ត្រីដ៏រីករាយ។

ការដើរចេញនេះបានធ្វើឡើងបន្ទាប់ពីសន្និបាតទូទៅនៃសហជីពផ្សព្វផ្សាយអឺរ៉ុប EBU — ជាក្រុមប្រព័ន្ធផ្សព្វផ្សាយរដ្ឋមកពី ៥៦ប្រទេស ដែលរៀបចំព្រឹត្តិការណ៍ប្រចាំឆ្នាំមួយនេះ — បានជួបពិភាក្សាគ្នាអំពីក្ដីបារម្ភលើវត្តមានរបស់អ៊ីស្រាអែល ដែលប្រទេសមួយចំនួនប្រឆាំងយ៉ាងដាច់ខាត ដោយសារការប្រព្រឹត្តរបស់ខ្លួនក្នុងសង្គ្រាមជាមួយក្រុមហាម៉ាស នៅតំបន់ហ្កាហ្សា។

ក្នុងកិច្ចប្រជុំនោះ សមាជិកក្រុម EBU បានបោះឆ្នោតអនុម័តច្បាប់ប្រកួតដ៏តឹងរ៉ឹង ដើម្បីឆ្លើយតបទៅនឹងការចោទប្រកាន់ថា អ៊ីស្រាអែលបន្លំការបោះឆ្នោតដើម្បីគាំទ្របេក្ខជនរបស់ពួកគេ ប៉ុន្តែក៏មិនបានចាត់វិធានការណាមួយដើម្បីដកអ្នកចូលរួមណាម្នាក់ចេញពីការប្រកួតដែរ។

សហជីពផ្សព្វផ្សាយនេះនិយាយថា ខ្លួនដឹងរួចហើយថា អ្នកផ្សាយចំនួន៤ ពោលគឺ RTVE នៅអេស្ប៉ាញ AVROTROS នៅហូឡង់ RTÉ នៅអៀរឡង់ និង RTVSLO របស់ស្លូវេនី បានប្រកាសជាសាធារណៈថា ពួកគេនឹងមិនចូលរួមនោះទេ។

កម្មវិធីប្រកួតប្រជែងតន្ត្រីប៉ុប Eurovision ដែលទាក់ទាញអ្នកទស្សនាជាង ១០០លាននាក់រៀងរាល់ឆ្នាំមួយនេះ រងសម្ពាធដោយសារសង្រ្គាមហ្កាហ្សា ក្នុងពេលពីរឆ្នាំចុងក្រោយនេះ ដោយធ្វើឱ្យមានការតវ៉ាជាញឹកញាប់ខាងក្រៅវេទិកាប្រកួត៕