ប្រធានាធិបតីរុស្ស៊ី លោក Vladimir Putin បាននិយាយថា សំណើមួយចំនួនក្នុងផែនការសន្តិភាពរបស់សហរដ្ឋអាមេរិក ដើម្បីបញ្ចប់សង្រ្គាមនៅអ៊ុយក្រែន គឺមិនអាចទទួលយកបាននោះទេចំពោះវិមានក្រឹមឡាំង ដោយបញ្ជាក់ជាថ្មីនៅក្នុងសេចក្តីអត្ថាធិប្បាយចេញផ្សាយកាលពីថ្ងៃព្រហស្បតិ៍ (៤ ធ្នូ) ថា កិច្ចព្រមព្រៀងណាមួយនៅតែមិនទាន់ធ្វើទៅបាននោះឡើយ។

ប្រធានាធិបតីអាមេរិក លោក Donald Trump បានបង្កើនការទូតដ៏ខ្លាំងក្លាបំផុត ដើម្បីបញ្ឈប់ការប្រយុទ្ធគ្នាអស់ជិត ៤ឆ្នាំរវាងរុស្ស៊ី និងអ៊ុយក្រែន។ ប៉ុន្តែកិច្ចប្រឹងប្រែងនេះបានជួបនូវការទាមទារដែលពិបាផ្សះផ្សារ ជាពិសេសទៅលើលទ្ធភាពថា អ៊ុយក្រែនអាចនឹងត្រូវលះបង់ទឹកដីទៅឱ្យរុស្ស៊ី ព្រមទាំងការធានាសន្តិសុខដើម្បីទប់ស្កាត់ការវាយប្រហារនាពេលអនាគត។

លោក Putin បាននិយាយថា កិច្ចពិភាក្សា ៥ម៉ោងរបស់លោក ក្នុងថ្ងៃអង្គារសប្ដាហ៍នេះ ជាមួយប្រេសិតពិសេសអាមេរិក លោក Steve Witkoff និងកូនប្រសាររបស់លោក Trump គឺលោក Jared Kushner បានធ្វើឡើងក្នុង "ភាពចាំបាច់" និង "មានប្រយោជន៍" ប៉ុន្តែក៏មាន "កិច្ចការលំបាក" ហើយសំណើមួយចំនួនមិនអាចទទួលយកបានទេ។

ថ្លែងទៅកាន់ប៉ុស្តិ៍ទូរទស្សន៍ India Today កាលពីថ្ងៃព្រហស្បតិ៍ លោក Putin បានលើកឡើងជាថ្មីថា សំណើរបស់អាមេរិក ដែលបានពិភាក្សាក្នុងកិច្ចប្រជុំនៅវិមានក្រឹមឡាំង គឺផ្អែកលើការពិភាក្សាមុនៗ រវាងរុស្ស៊ី-អាមេរិក រួមទាំងកិច្ចប្រជុំកំពូលអាឡាស្កា ក្នុងខែសីហា ដោយរួមបញ្ចូលធាតុថ្មីៗផងដែរ ប៉ុន្តែមានចំណុចមួយចំនួន "មិនអាចយល់ស្របបាននោះទេ"៕