ដំណើរតាមស្វែងរកការសាងសង់នាវាមុជទឹកដើរដោយថាមពលនុយក្លេអ៊ែររបស់កូរ៉េខាងត្បូង កំពុងទទួលបានការចាប់អារម្មណ៍ បន្ទាប់ពីមានការគាំទ្រពីលោកប្រធានាធិបតី Donald Trump ដោយបញ្ចប់ប្រកែករាប់ទសវត្សរ៍របស់សហរដ្ឋអាមេរិក ក្នុងជំហានមួយដែលអតីតមន្រ្តីយោធា និងអ្នកជំនាញនិយាយថា អាចផ្លាស់ប្តូរទិដ្ឋភាពសន្តិសុខរបស់អាស៊ី និងបង្កើនការប្រណាំងប្រជែងសព្វាវុធក្រោមទឹក កាន់តែខ្លាំងឡើង។

ទីក្រុងសេអ៊ូល ប្រឹងប្រែងជាយូរមកហើយដើម្បីចូលរួមជាមួយប្រទេសមួយចំនួនតូច ដែលកំពុងប្រតិបត្តិការនាវាមុជទឹកនុយក្លេអ៊ែរ ដើម្បីទប់ទល់នឹងកូរ៉េខាងជើង។ ការបើកភ្លើងខៀវរបស់លោក Trump បានលុបចោលឧបសគ្គដ៏សំខាន់មួយ ដោយផ្តល់នូវសិទ្ធិប្រើប្រាស់ឥន្ធនៈ ក្រោមកិច្ចព្រមព្រៀងនុយក្លេអ៊ែររវាងប្រទេសទាំងពីរ។

យ៉ាងណាមិញ កម្មវិធីដែលកំពុងអភិវឌ្ឍយ៉ាងឆាប់រហ័សរបស់កូរ៉េខាងត្បូងមួយនេះ អាចធ្វើឱ្យប្រទេសចិន មិនពេញចិត្ត ហើយអាចដាក់សម្ពាធលើជប៉ុន ឱ្យអភិវឌ្ឍសមត្ថភាពស្រដៀងគ្នា នេះបើតាមការលើកឡើងរបស់ក្រុមអ្នកវិភាគ និងអតីតមន្ត្រីយោធា។ លោក ឆយ អ៊ីល (Choi Il) ប្រធានក្រុមនាវាមុជទឹកកូរ៉េខាងត្បូងដែលចូលនិវត្តន៍ បាននិយាយថា «នាវាមុជទឹកគឺជាប្រព័ន្ធវាយប្រហារដ៏មានប្រសិទ្ធភាពខ្ពស់ ហើយការប្រណាំងសព្វាវុធក្នុងតំបន់ គឺជៀសមិនរួចនោះទេ»។

កូរ៉េខាងត្បូងអះអាងថា ប្រព័ន្ធជំរុញនុយក្លេអ៊ែរគឺមានសារៈសំខាន់ណាស់ដើម្បីទប់ទល់នឹងការគំរាមកំហែងក្រោមទឹករបស់កូរ៉េខាងជើង រួមទាំងមីស៊ីលផ្លោងដែលបាញ់ចេញពីនាវាមុជទឹក ហើយបាននិយាយម្តងហើយម្តងទៀតថា ខ្លួននឹងមិនផលិតអាវុធនុយក្លេអ៊ែរទេ ហើយប្ដេជ្ញាចិត្តគោរពរបប មិនរីកសាយភាយអាវុធនុយក្លេអ៊ែរ៕