ប្រព័ន្ធផ្សព្វផ្សាយរបស់អង្គការសហប្រជាជាតិ UN News បានរាយការណ៍កាលពីថ្ងៃព្រហស្បតិ៍ (៤ ធ្នូ) ថា ព្យុះភ្លៀងដ៏មហន្តរាយដែលមិនធ្លាប់បានឃើញក្នុងពេលជាច្រើនឆ្នាំ នៅអាស៊ីខាងត្បូង និងអាស៊ីអាគ្នេយ៍ ចាប់ពីតំបន់ខ្ពង់រាបកណ្តាលរបស់ប្រទេសស្រីលង្កា រហូតដល់ឥណ្ឌូនេស៊ី ដែលបង្កឡើងដោយអាកាសធាតុធ្ងន់ធ្ងរនិងភ្លៀងមូសុង បានសម្លាប់មនុស្សលើសពី ១.៦០០នាក់ និងប៉ះពាល់ដល់អ្នកស្រុករាប់លាននាក់។

ចាប់ពីពាក់កណ្តាលខែវិច្ឆិកាមក ព្យុះត្រូពិកត្រួតស៊ីគ្នា និងប្រព័ន្ធខ្យល់មូសុង បានបង្កឱ្យមានមហន្តរាយទឹកជំនន់ និងបំណាក់ដីទូទាំងប្រទេសស្រីលង្កា ឥណ្ឌូនេស៊ី ថៃ ម៉ាឡេស៊ី និងវៀតណាម។

នៅឥណ្ឌូនេស៊ី ភ្លៀងធ្លាក់ឥតឈប់ឈរចន្លោះថ្ងៃទី២២ ដល់ថ្ងៃទី២៥ ខែវិច្ឆិកា បានបង្កមហន្តរាយធ្ងន់ធ្ងរនៅទូទាំងខេត្តអាឆេ ស៊ូម៉ាត្រាខាងលិច និងស៊ូម៉ាត្រាខាងជើង។ តួលេខផ្លូវការបង្ហាញថា មានអ្នកស្លាប់លើសពី ៨០០នាក់ ហើយមនុស្សយ៉ាងតិច ៥០០នាក់ នៅតែបាត់ខ្លួន។

នៅប្រទេសថៃ ភ្លៀងមូសុងខ្លាំងក្លាបានវាយលុកភាគខាងត្បូង ដោយខេត្តចំនួន១២ បានរងផលប៉ះពាល់ ខណៈមន្រ្តីនិយាយថា មានអ្នកស្លាប់មានជិត ៣០០នាក់។ ការស្លាប់រាប់រយនាក់ក៏ត្រូវបានរាយការណ៍នៅស្រីលង្កា និងមួយចំនួនទៀតនៅក្នុងប្រទេសដែលរងផលប៉ះពាល់នានា។

ក្រុមការងាររបស់ UN កំពុងគាំទ្រប្រតិបត្តិការសង្គ្រោះបន្ទាន់ ដែលដឹកនាំដោយរដ្ឋាភិបាល។ នៅទូទាំងតំបន់នោះ មនុស្សជិត ១១លាននាក់ បានរងផលប៉ះពាល់ រួមទាំងប្រហែល ១,២លាននាក់ ត្រូវបង្ខំឱ្យចាកចេញពីផ្ទះសម្បែងរបស់ពួកគេទៅកាន់ទីជម្រក ខណៈផ្លូវថ្នល់ ហេដ្ឋារចនាសម្ព័ន្ធ និងដីស្រែសម្ការ បន្តលិចលង់ក្នុងគ្រោះមហន្តរាយធម្មជាតិដ៏កំណាចនេះ៕