អង្គការសុខភាពពិភពលោក (WHO)បាននិយាយកាលពីថ្ងៃព្រហស្បតិ៍ថា ការស្លាប់ដែលទាក់ទងនឹងជំងឺគ្រុនចាញ់កាលពីឆ្នាំមុន បានកើនឡើង ដោយព្រមានអំពីការកើនឡើងនៃករណីឆ្លង និងស្ថានភាពពិបាកក្នុងព្យាបាលការជំងឺនេះនាពេលបច្ចុប្បន្ន។

មានករណីឆ្លងជំងឺគ្រុនចាញ់ប្រហែល ២៨២ លានករណី និងការស្លាប់ចំនួន ៦១០.000 ករណី ត្រូវបានកត់ត្រា ទូទាំងពិភពលោកក្នុងឆ្នាំ ២០២៤ ដែលកើនឡើងតិចតួច បើប្រៀបធៀបទៅនឹងរយៈពេល ១២ ខែ ឆ្នាំ ២០២៣ ដែលគូសបញ្ជាក់ពីជំងឺដែលឆ្លងតាមមូសថា ជាបញ្ហាសុខភាពពិភពលោកដ៏ធ្ងន់ធ្ងរដែលកំពុងបន្ត។

លោក Tedros Adhanom Ghebreyesus ប្រធានអង្គការសុខភាពពិភពលោក បាននិយាយថា ការកើនឡើងនៃការស្លាប់ និងករណីឆ្លងជំងឺ រួមផ្សំជាមួយនឹងការកាត់បន្ថយថវិកា «គំរាមកំហែងដល់វឌ្ឍនភាពដែលយើងសម្រេចបាន ក្នុងរយៈពេលពីរទសវត្សរ៍កន្លងមក»។

ប៉ុន្តែលោកបានបន្ថែមថា៖«ពុំមានបញ្ហាប្រឈមណាមួយ ដែលមិនអាចយកឈ្នះបាននោះទេ។ ដោយមានថ្នាក់ដឹកនាំនៃប្រទេសដែលរងផលប៉ះពាល់ខ្លាំងបំផុត និងការវិនិយោគជាគោលដៅ ចក្ខុវិស័យនៃពិភពលោកដែលគ្មានជំងឺគ្រុនចាញ់ នៅតែអាចសម្រេចបាន»។

ទ្វីបអាហ្វ្រិកនៅតែជាតំបន់ដែលរងផលប៉ះពាល់ខ្លាំងបំផុត ដោយមានករណីឆ្លងជំងឺគ្រុនចាញ់ចំនួន ៩៤ ភាគរយ និងការស្លាប់ដោយសារជំងឺគ្រុនចាញ់ចំនួន ៩៥ ភាគរយ ដែលភាគច្រើន (៧៥ភាគរយ) ពាក់ព័ន្ធនឹងកុមារអាយុក្រោម ៥ឆ្នាំ។

អង្គការសុខ WHO បាននិយាយនៅក្នុងរបាយការណ៍ថ្មីមួយថា ប្រទេសចំនួន ៥ គឺ សាធារណរដ្ឋប្រជាធិបតេយ្យកុងហ្គោ អេត្យូពី ម៉ូសំប៊ិក នីហ្សេរីយ៉ា និងអ៊ូហ្គង់ដា មានចំនួនជាងពាក់កណ្តាលនៃចំនួនករណីឆ្លងជំងឺគ្រុនចាញ់៕