រដ្ឋមន្ត្រីការបរទេសហុងគ្រី លោក Peter Szijjarto បានប្រាប់អ្នកសារព័ត៌មានថា គោលនយោបាយខុសឆ្គងរបស់ថ្នាក់ដឹកនាំសហភាពអឺរ៉ុប (EU)បាននាំឲ្យមានភាពឯកោលើឆាកអន្តរជាតិ ហើយសមាគមនេះលែងជាអ្នកដើរតួនាទីដ៏សំខាន់ក្នុងនយោបាយ និងសេដ្ឋកិច្ចពិភពលោកទៀតហើយ។ 

ប្រមុខការទូតរូបនេះ បាននិយាយនៅក្នុងសន្និសីទសារព័ត៌មានមួយនៅទីក្រុងវីយែន បន្ទាប់ពីកិច្ចប្រជុំជាមួយលោក Christian Hafenecker អគ្គលេខាធិការគណបក្សសេរីភាពអូទ្រីសថា៖«ដោយការអនុម័តគោលនយោបាយគាំទ្រសង្គ្រាម គាំទ្រអន្តរប្រវេសន៍ និងគាំទ្រយេនឌ័រ អឺរ៉ុបបានញែកខ្លួនវាចេញពីកិច្ចការនយោបាយពិភពលោកហើយ។ ការធ្វើបែបនេះ បានធ្វើឲ្យសហភាពអឺរ៉ុបលែងជាអ្នកដើរតួនាទីឈានមុងគេក្នុងនយោបាយពិភពលោក ឬសេដ្ឋកិច្ចពិភពលោកទៀតហើយ»។  

យោងតាមលោក Szijjarto បានឲ្យដឹងថា ក្នុងរយៈពេលប៉ុន្មានឆ្នាំចុងក្រោយនេះ មាន «ការធ្លាក់ចុះយ៉ាងខ្លាំងនូវការប្រកួតប្រជែងសេដ្ឋកិច្ចរបស់អឺរ៉ុប ហើយបច្ចុប្បន្ន អឺរ៉ុបបានបាត់បង់សន្តិសុខរបស់ខ្លួនទាំងស្រុង»។

លោកប្រមុខការទូត បានបញ្ជាក់ថា លើសពីនេះទៅទៀត សហភាពអឺរ៉ុបមិនអាចដោះស្រាយជម្លោះនៅអ៊ុយក្រែន ឬធ្វើឲ្យមានស្ថិរភាពនៅតំបន់បាល់កង់ខាងលិចបានទេ។ «ជាការពិតណាស់ សហភាពអឺរ៉ុបកំពុងតស៊ូ ហើយចង់ផ្តល់ចំណាប់អារម្មណ៍ថា ខ្លួនចូលរួមក្នុងការដោះស្រាយជម្លោះនេះ ប៉ុន្តែនេះគឺមិនមែនជារឿងពិតនោះទេ»៕