ក្រសួងការពារជាតិកាណាដា បាននិយាយកាលពីថ្ងៃព្រហស្បតិ៍ (៤ ធ្នូ) ថា យោធារបស់ខ្លួនកំពុងរៀបចំរចនាសម្ព័ន្ធឡើងវិញ ដោយការបង្កើតបញ្ជាការរួម ដើម្បីធ្វើឱ្យកងកម្លាំងកាន់តែមានភាពរហ័សរហួន និងអាចសម្របខ្លួនទៅនឹងបច្ចេកវិទ្យាថ្មីៗ ជុំវិញអ្វីដែលប្រធានអង្គភាពនេះហៅថា មេរៀនពីសង្រ្គាមនៅអ៊ុយក្រែន។

បន្ទាប់ពីការនាំមុខរបស់សម្ព័ន្ធមិត្តដូចជាអូស្ត្រាលី កាណាដាបានបង្កើតនូវបញ្ជាការកងកម្លាំងរួមថ្មីមួយ ដែលនឹងទទួលបន្ទុកធាតុជំនួយសំខាន់ៗដូចជា សេវាសុខភាពយោធា ការដឹកជញ្ជូន និងសាខាគាំទ្រប្រតិបត្តិការ និងនគរបាលយោធា។

លើសពីនេះ អង្គភាពនេះនឹងទទួលបន្ទុកលើវិស័យថ្មី និងកំពុងលេចឡើង ទាក់ទងនឹងសង្គ្រាមប្រឆាំងយានដ្រូន ហើយនៅទីបំផុត អាចនឹងមើលការខុសត្រូវលើវិស័យការពារដែនអាកាស និងមីស៊ីលរួមបញ្ចូលគ្នា នេះបើតាមការលើកឡើងរបស់លោក Darcy Molstad មេបញ្ជាការថ្មីនៃបញ្ជាការកងកម្លាំងរួមកាណាដា (CJFC)។

លោកសង្កត់ធ្ងន់ថា អង្គភាពរបស់លោក ទទួលខុសត្រូវចំពោះសមត្ថភាពយោធារួម ដែលលាតសន្ធឹងលើគ្រប់វិស័យ ដូចជាដីគោក សមុទ្រ អាកាស អ៊ីនធឺណិត និងលំហជាដើម ដោយអនុវត្តនូវអ្វីដែលលោកនិយាយថា មេរៀនក្នុងសង្រ្គាមអ៊ុយក្រែន ជាទីដែលប្រព័ន្ធបញ្ជា ការគ្រប់គ្រងនិងការប្រើប្រាស់បច្ចេកវិទ្យាពីរផ្លូវ ព្រមទាំងប្រព័ន្ធទំនាក់ទំនង បានផ្តល់នូវការយល់ដឹងបន្ថែមអំពីស្ថានភាពនៅក្នុងសមរភូមិ៕