របាយការណ៍របស់ក្រុមយុទ្ធនាការ Global Witness បានឱ្យដឹងថា មនុស្សរហូតដល់ទៅ ៦.៥០០នាក់ ប្រឈមហានិភ័យនៃការបាត់បង់ទីលំនៅ ក្នុងប្រទេសកុងហ្គោ ដោយសារគម្រោងហេដ្ឋារចនាសម្ព័ន្ធតម្លៃរាប់ពាន់លានដុល្លារ ដែលផ្តល់មូលនិធិដោយប្លុកអឺរ៉ុប និងសហរដ្ឋអាមេរិក ស្របពេលការប្រណាំងប្រជែងជាសកលដើម្បីទទួលបានការផ្គត់ផ្គង់រ៉ែទង់ដែង និង "សារធាតុរ៉ែកម្រសំខាន់ៗ" ផ្សេងទៀត។

គម្រោងនេះឈ្មោះថា "ច្រករបៀងឡូប៊ីតូ" មានគោលបំណងធ្វើឱ្យប្រសើរឡើងនូវផ្លូវរថភ្លើង Benguela សម័យអាណានិគម ចាប់ពីកុងហ្គោ ទៅកាន់ខេត្តឡូប៊ីតូ លើឆ្នេរប្រទេសអង់ហ្គោឡា និងកែលម្អហេដ្ឋារចនាសម្ព័ន្ធផ្សេងទៀត។ អង់ហ្គោឡានិយាយថា ខ្លួនត្រូវការ ៤,៥ពាន់លានដុល្លារ សម្រាប់ការពង្រីកខ្សែបន្ទាត់នៃច្រករបៀងនេះ។

គម្រោងនេះរៀបចំឡើងដើម្បីជួយសម្រួលដល់ការនាំចេញសារធាតុរ៉ែកម្រ ដែលប្រើប្រាស់ក្នុងបច្ចេកវិទ្យាថាមពលបៃតង ដូចជាអាគុយរថយន្តអគ្គិសនីជាដើម។ ចំណាត់ការនេះកើតឡើងនៅពេលបណ្តាប្រទេសលោកខាងលិច ចិន និងរដ្ឋឈូងសមុទ្រ កំពុងប្រជែងគ្នាដើម្បីគ្រប់គ្រងពាណិជ្ជកម្មរ៉ែកម្រ។

អ្នកនាំពាក្យមួយរូបរបស់គណៈកម្មាការសហភាពអឺរ៉ុបបាននិយាយថា គម្រោងនេះស្ថិតក្នុងដំណាក់កាលដំបូងនៅឡើយ ចំណែកផលប៉ះពាល់ដែលអាចកើតមានទាក់ទងនឹងផែនការនេះ នឹងត្រូវបានវាយតម្លៃតាមរយៈការសិក្សាលម្អិតនានា៕