បន្ទាប់ពីរង់ចាំជិត ២ខែ ភាពស្ងប់ស្ងាត់ដ៏ផុយស្រួយរបស់តំបន់ហ្កាហ្សា កាន់តែមានភាពមិនច្បាស់លាស់ខ្លាំងឡើងៗ ដ្បិតមិនទាន់ឃើញចាប់ផ្តើមនៅឡើយទេ ចំពោះការសន្យាអនុវត្តដំណាក់កាលទី២ នៃកិច្ចព្រមព្រៀងបទឈប់បាញ់ រវាងអ៊ីស្រាអែល និងក្រុមហាម៉ាស ពោលគឺជាអ្វីដែលត្រូវបានគេរំពឹងថា នឹងនាំឲ្យមានការដកកងកម្លាំងរបស់អ៊ីស្រាអែល ការវិលត្រឡប់ទៅវិញនៃក្រុមគ្រួសារអ្នកស្រុកហ្កាហ្សាដែលបានភៀសចេញ ហើយនិងការមានឡើងវិញនូវដំណើរជីវិតប្រចាំថ្ងៃមួយចំនួន។ ហើយសម្រាប់ប្រជាជនប៉ាឡេស្ទីនរាប់ពាន់នាក់ដែលជីវិតរបស់ពួកគេត្រូវបានបន្ទច់បង្អាក់ ការពន្យារនពេលនេះកំពុងធ្វើឲ្យមានការភ័យខ្លាច ការថប់បារម្ភ និងភាពហត់នឿយកាន់តែខ្លាំងឡើងៗ បន្ទាប់ពីមានសង្គ្រាមដ៏មហន្តរាយរយៈពេល ២ឆ្នាំ។

នៅទូទាំងតំបន់ហ្កាហ្សាស្ទ្រីបភាគខាងជើង អ្នកស្រុកពណ៌នាពីជីវិតរស់នៅ ដែលស្ថិតនៅចន្លោះក្តីសង្ឃឹម និងសេចក្តីភ័យខ្លាច ដោយមិនដឹងថា នឹងមានអ្វីកើតឡើងនាពេលបន្ទាប់ ខណៈពេលដែលការវាយប្រហារ និងសកម្មភាពយោធារបស់អ៊ីស្រាអែល បន្តធ្វើឲ្យរង្គោះរង្គើដល់ការជឿជាក់របស់ពួកគេ ចំពោះភាពស្ថិតស្ថេរយូរអង្វែងនៃបទឈប់បាញ់។

នៅឯជំរុំជនភៀសខ្លួន Jabalia លោក Sa'ib Abu Humaid ឈរសម្លឹងទៅអ្វីដែលធ្លាប់ជាផ្ទះរបស់លោក ដោយបានប្រែក្លាយទៅជាគំនរបេតុងបាក់បែក នៅពីក្រោយ «បន្ទាត់ពណ៌លឿង» ដែលកំណត់បែងចែកតំបន់ហ្កាហ្សា ដែលនៅតែស្ថិតក្រោមកាន់កាប់ពីទាហានអ៊ីស្រាអែល ហើយជនជាតិប៉ាឡេស្ទីនមិនអាចចេញចូលបានឡើយ។ ទោះបីជាមានការបំផ្លិចបំផ្លាញធ្ងន់ធ្ងរបែបនេះក៏ដោយ ក៏បុរសអាយុ ៣៨ឆ្នាំ ចង់ត្រឡប់ទៅវិញដែរ។

យ៉ាងណាក្ដី លោកនិយាយថា សេចក្តីថ្លែងការណ៍ថ្មីៗរបស់មន្ត្រីអ៊ីស្រាអែលដែលហាក់ដូចជាភ្ជាប់ការចាប់ផ្តើមនៃដំណាក់កាលបន្ទាប់ទៅនឹងការរំសាយអាវុធរបស់ក្រុមហាម៉ាស ដែលមិនមែនជាផ្នែកនៃលក្ខខណ្ឌបទឈប់បាញ់ដំបូង បានធ្វើឲ្យលោកមានក្ដីបារម្ភកាន់តែខ្លាំងឡើងៗ។ 

គួរបញ្ជាក់ថា នៅក្រោមកិច្ចព្រមព្រៀងនេះ ដំណាក់កាលទី២ នឹងចាប់ផ្តើម បន្ទាប់ពីក្រុមហាម៉ាសបានប្រគល់ត្រឡប់ទៅអ៊ីស្រាអែលវិញនូវចំណាប់ថ្នូរទាំងអស់ ទាំងស្លាប់ និងនៅរស់ ដែលត្រូវបានឃុំខ្លួននៅតំបន់ហ្កាហ្សា។ អដ្ឋិធាតុចំណាប់ថ្នូរម្នាក់ មិនទាន់ត្រូវបានប្រគល់ឲ្យនៅឡើយទេ៕