តំណាងពាណិជ្ជកម្មអាមេរិក លោក Jamieson Greer បាននិយាយថា សហរដ្ឋអាមេរិក កំពុងផ្តល់អាទិភាពដល់ថាមវន្តពាណិជ្ជកម្មប្រកបដោយស្ថិរភាពជាមួយប្រទេសចិន បើទោះបីជាមានការជំរុញពីសម្ព័ន្ធមិត្តមួយចំនួនឲ្យចាត់វិធានការរួមគ្នាប្រឆាំងនឹងទីក្រុងប៉េកាំងក៏ដោយ។

កាលពីថ្ងៃព្រហស្បតិ៍ (ទី៤ ខែធ្នូ) នៅឯកិច្ចប្រជុំកំពូលកំណើនសេដ្ឋកិច្ចអាមេរិក (American Growth Summit) នៅទីក្រុងវ៉ាស៊ីនតោន លោក Greer បានលើកឡើងថា៖ «ខ្ញុំមិនគិតថា មាននរណាម្នាក់ចង់បង្កជម្លោះសេដ្ឋកិច្ចទាំងស្រុងជាមួយប្រទេសចិននោះឡើយ ហើយយើងនឹងមិនធ្វើរឿងនោះទេ»។

លោកបានបញ្ជាក់ថា៖ «តាមពិតទៅ លោកប្រធានាធិបតី (Donald) Trump មានឱកាសប្រើប្រាស់ឥទ្ធិពលទាំងអស់ដែលយើងមានប្រឆាំងនឹងប្រទេសចិន ហើយយើងមានច្រើនណាស់ មិនថាវាទាក់ទងនឹង Software (សូហ្វវែរ) បន្ទះឈីប ឬអ្វីៗគ្រប់ប្រភេទ។ សម្ព័ន្ធមិត្តជាច្រើនចាប់អារម្មណ៍ ក្នុងការចាត់វិធានរួមគ្នា ប៉ុន្តែការសម្រេចចិត្ត នាពេលនេះ គឺយើងចង់ឲ្យមានស្ថិរភាព នៅក្នុងទំនាក់ទំនងនេះ»។

ជាមួយគ្នានេះ លោក Greer បានអះអាងថា ឱនភាពពាណិជ្ជកម្មរបស់សហរដ្ឋអាមេរិកជាមួយចិន បានធ្លាក់ចុះ «ប្រហែល ២៥ភាគរយ» ចាប់តាំងពីលោកប្រធានាធិបតី Donald Trump ឡើងកាន់តំណែង ដោយនេះគឺជាការផ្លាស់ប្តូរក្នុង «ទិសដៅដ៏ត្រឹមត្រូវ» សម្រាប់ក្រុមដែលកំពុងស្វែងរកតុល្យភាពលំហូរទំនិញ។ ទន្ទឹមនឹងនេះដែរ លោកបានទទួលស្គាល់ថា ផលិតផលរបស់ចិន នៅតែមានឆ្ពោះទៅកាន់សហរដ្ឋអាមេរិក ក្នុងនោះរួមទាំងការដឹកជញ្ជូនតាមរយៈប្រទេសផ្សេងៗផងដែរ។

គួរបញ្ជាក់ថា លោក Trump និងប្រធានាធិបតីចិន លោក Xi Jinping បានធ្វើកិច្ចព្រមព្រៀងមួយ កាលពីចុងខែតុលា ជាអ្វីដែលបានឃើញថា ភាគីទាំង២ យល់ព្រមបន្តផ្អាកជម្លោះដំឡើងអត្រាពន្ធ បញ្ឈប់ការគ្រប់គ្រងលើការនាំចេញ និងកាត់បន្ថយរបាំងពាណិជ្ជកម្មផ្សេងទៀត៕