​ចិន៖ ប្រមុខ​ការទូត​ចិន​លោក Wang Yi បាន​ចោទប្រកាន់​សហរដ្ឋអាមេរិក​ពី​បទ​ព្យាយាម​ទប់​ទល់នឹង​ប្រទេស​ចិន ជាជាង​ការ​ពង្រឹង​ទំនាក់ទំនង​រវាង​ប្រទេស​ទាំង​២ និង​បាន​និយាយ​ថា ​អាមេរិក​កំពុង​ប្រើប្រាស់​កោះ​តៃវ៉ាន់​ទប់ទល់​នឹង​ចិន ខណៈ​លោក​បាន​សន្ទនា​តាម​ទូរស័ព្ទ​ជាមួយ​ប្រមុខ​ការទូត​អាមេរិក​លោក Antony Blinken​។​

​ការ​អត្ថាធិប្បាយ​ធ្វើឡើង​ដោយ​លោក Wang អំឡុង​ការសន្ទនា​តាម​ទូរស័ព្ទ​ជាមួយ​លោក Blinken កាលពី​ថ្ងៃ​អង្គារបាន​ផ្ដល់​សញ្ញា​ចុងក្រោយ​បំផុត​ថា ក្រុង​ប៉េកាំង​ចង់​ឲ្យ​ក្រុង​វ៉ាស៊ីនតោន​ផ្លាស់ប្ដូរ​គោល​នយោបាយ​របស់​ខ្លួន​ចំពោះ​ប្រទេស​ចិន មុន​ពេល​ស្វែងរក​កិច្ច​សហប្រតិបត្តិការ​បន្ថែម​ទៀត​។ ​ស្ថានភាព​នៅ​ក្នុង​ប្រទេស​អ៊ុយ​ក្រែ​ន​ និង​ប្រទេស​រុស្ស៊ី​គឺជា​របៀបវារៈ​សំខាន់​បំផុត ខណៈ​ដែល​លោក Blinken សង្កត់ធ្ងន់​ពី​ភាព​ចាំបាច់​ក្នុង​ការ​ការពារ​អធិបតេយ្យភាព និង​បូរណភាព​របស់​ខ្លួន ហើយ​លោក Wang បាន​និយាយ​ថា គ្រប់​ភាគី​ទាំងអស់​គួរតែ​ធ្វើការ​សម្រេចចិត្ត និង​ដោះស្រាយ​វិបត្តិ​តាមរយៈ​ការសន្ទនា។

​ប្រទេស​ចិនបាន​ជំរុញ​ដល់​ភាគី​អាមេរិក​ឲ្យ​ចាត់វិធានការ​ម៉ឺងម៉ាត់ ដើម្បី​គោរព​ដល់​ការ​តាំង​ចិត្ត​នានា​ធ្វើឡើង​ដោយ​លោក​ប្រធានាធិបតី​ Joe Biden ជាជាង​និយាយ​តែ​ពី​រឿង​ខ្វែងគំនិត​គ្នា​។​ សេចក្ដី​ថ្លែងការណ៍​រប​ស់​ក្រសួងការបរទេស​ចិនក៏បាន​និយាយ​ផង​ដែរ​ថា លោក Blinken បាន​អបអរសាទរ​ដល់​ក្រុង​ប៉េកាំង​ក្នុង​ការ​រៀបចំ​ធ្វើជា​ម្ចាស់ផ្ទះ​នៃ​ព្រឹត្តិការណ៍​ប្រកួត​កីឡា​អូឡាំពិក​រដូវរងា ទោះ​បី​ក្រុងវ៉ាស៊ីនតោនធ្វើ​ពហិការ​ការទូត​មិន​ចូលរួម​ក្នុង​ព្រឹត្តិការណ៍​នេះ​ក៏ដោយ៕

អត្ថបទ៖ សុខមាន