ភ្នំពេញ៖ ឯកឧត្តម ងុយ រិទ្ធ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ នៅ​ព្រឹក​ថ្ងៃ​ទី​៥ ខែធ្នូ ឆ្នាំ២០២៥ បានអញ្ជើញជួបសំណេះសំណាលជាមួយថ្នាក់ដឹកនាំសហព័ន្ធសហជីព ដែល​ជំនួប​ទៀងទាត់ប្រចាំខែនេះមានគោលដៅពង្រឹងភាពជាដៃគូ ដើម្បីរួមគ្នាពិនិត្យ និង​ដោះ​ស្រាយ​រាល់​បញ្ហា ក៏ដូចជាក្តាប់នូវបញ្ហាប្រឈម និងវិវាទការងារផ្សេងៗរបស់បងប្អូនកម្មករ និយោជិត​នៅ​កន្លែងធ្វើការ។

ឯកឧត្តមរដ្ឋលេខាធិការ បានកោតសរសើរ ចំពោះការចូល​រួម​របស់​សហជីព​ទាំង​ក្នុង​សកម្ម​ភាព​ការងារ និងទាំងកិច្ចការសង្គម។ ទន្ទឹមនេះ ឯកឧត្តម​ក៏​បាន​ជំរុញ​យ៉ាងមុ​តមាំ​ឱ្យប្រ​ធាន​សហព័ន្ធ​សហជីព ខិតខំពង្រឹងតួនាទី និងធ្វើការឱ្យបានជិតស្និទ្ធជាមួយសហជីពមូលដ្ឋាន ដើម្បីរាយ​ការណ៍​នូ​វបញ្ហានានាតាមរោងចក្រ សហគ្រាសមក​កាន់​ក្រសួង​ឱ្យ​បាន​ទាន់​ពេល​វេលា​សម្រាប់​កិច្ច​អន្ត​រាគមន៍​ប្រកបដោយប្រសិទ្ធភាព។

ជាការផ្តាំផ្ញើ ឯកឧត្តម ងុយ រិទ្ធ ស្នើឱ្យសហជីពមូលដ្ឋានទាំងអស់ពង្រឹងសមត្ថភាព និងកសាង​នូវ​ការ​ជឿទុ​កចិត្តពីកម្មករ ខណៈក្រសួងបានត្រៀមនូវគ្រប់មធ្យោបាយទំនាក់ទំនង សម្រាប់​ទទួល​ព័ត៌មាន និងបណ្តឹងដូចជា ប្រអប់បណ្តឹងអនាមិក ប្រព័ន្ធតេឡេក្រាម លេខទូរសព្ទមន្ត្រី លេខ Hotline ១២៨៦ ក្នុងគោលដៅសំខាន់នោះគឺ ចៀសវាងឱ្យបាននូវការតវ៉ាខុសនីតិវិធី ឬបិទ​ផ្លូវ​សាធារណៈ​ ដែលជាអំពើល្មើសច្បាប់ ដោយត្រូវទុក​ចិត្ត​លើ​​យន្តការ​សម្រប​សម្រួល​ដោះ​ស្រាយ​របស់​ក្រសួង​តាមរយៈមន្ត្រីអធិការកិច្ចការងារ។

ជាមួយគ្នានេះដែរក្នុងនាមក្រសួង ឯកឧត្តម ងុយ រិទ្ធ បានណែនាំដល់ថ្នាក់​ដឹក​នាំ​សហព័ន្ធ​សហជីព​ទាំ​ងអស់ ត្រូវខិតខំពង្រឹងសមត្ថភាព ដើម្បីចូលរួមចំណែកជួយការពារសិទ្ធិ និងផល​ប្រយោជន៍​ស្រប​ច្បាប់របស់បងប្អូនកម្មករនិយោជិត ហើយអនុវត្តឱ្យបាន​ត្រឹមត្រូវ​ទៅ​តាម​នីតិ​វិធី​ជា​ធរមាន​ ក្នុងការស្វែងរកការផ្សះផ្សាដោះស្រាយវិវាទ ប្រកបដោយតម្លាភាព វិជ្ជាជីវៈ​ហើយ​សមាជិក​សហជីព​អាច​ទទួលបាននូវការការពារប្រកបដោយតម្លាភាព គណនេយ្យភាព សមធម៌ និង​បរិយាបន្ន​៕