ការស្ទង់របស់អង្គការសហប្រជាជាតិ(UN) បានឲ្យដឹងថា ការដាំអាភៀននៅមីយ៉ាន់ម៉ា បានហក់ឡើងដល់កម្រិតខ្ពស់បំផុតក្នុងរយៈពេល ១ទសវត្សរ៍ក្នុងឆ្នាំនេះ ពេលដែលប្រទេសជាប់ផុងក្នុងសង្រ្គាមស៊ីវិលមួយនេះ នៅតែស្ថិតក្នុងចំណោមអ្នកផ្គត់ផ្គង់គ្រឿងញៀនដ៏ចម្បងរបស់ពិភពលោក ។

កំណើននេះ ធ្វើឲ្យមីយ៉ាន់ម៉ាក្លាយជាប្រភពដ៏សំខាន់នៃអាភៀនខុសច្បាប់របស់ពិភពលោក ជាពិសេសបន្ទាប់ពីការធ្លាក់ចុះយ៉ាងខ្លាំងការផលិតគ្រឿងញៀននៅអាហ្វហ្គានីស្ថាន ក្រោយក្រុមតាលីបង់ដាក់បំរាម បន្ទាប់ពីការដណ្តើមអំណាចរបស់ពួកគេកាលពីឆ្នាំ ២០២១ ។

របាយការណ៍ស្ទង់អាភៀនមីយ៉ាន់ម៉ាឆ្នាំ ២០២៥ ចេញដោយការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម(UNODC)កាលពីថ្ងៃពុធ រកឃើញថា កន្លែងដាំអាភៀន បានកើនឡើងចំនួន ១៧ភាគរយ ធៀបនឹងឆ្នាំ ២០២៤ ពោលគឺបានដាំដុះនៅលើផ្ទៃដីរហូតដល់ ៥៣.១០០ហិចតា ដែលជាផ្ទៃដីធំបំផុតចាប់តាំងពីឆ្នាំ ២០១៥ ។

UNODC បានចាត់ទុកផងដែរថា មីយ៉ាន់ម៉ាជាប្រទេសផលិតមេតំហ្វេតាមីនធំបំផុតរបស់ពិភពលោក ។

អាភៀនដែលផលិតចេញជាម៉ូហ្វីន និងហេរ៉ូអ៊ីន ត្រូវបានប្រមូលផលពីផ្កាអាភៀន ហើយកសិករមីយ៉ាន់ម៉ាត្រូវបានជំរុញកាន់តែខ្លាំងក្នុងការប្រមូលផល ស្របពេលប្រទេសមួយនេះ ប្រឈមភាពក្រីក្រទ្រង់ទ្រាយធំ ហើយនិងអស្ថិរភាពនយោបាយ អំឡុងសង្រ្គាមស៊ីលដែលបានផ្ទុះឡើង ក្រោយកងទ័ពទម្លាក់រដ្ឋាភិបាលជាប់ឆ្នោតរបស់លោកស្រី Aung San Suu Kyi កាលពីខែកុម្ភៈ ឆ្នាំ ២០២២ ។

កត្តារុញច្រានដ៏សំខាន់នៃកំណើនការផលិតគ្រឿងញៀនរបស់មីយ៉ាន់ម៉ា ដោយសារការហក់ឡើងខ្ពស់តម្លៃអាភៀន ។ បច្ចុប្បន្នអាភៀនស្រស់ មានតម្លៃប្រហែល ៣២៩ដុល្លារ ក្នុង ១គ.ក ដែលមានតម្លៃកើនឡើងទ្វេដងនឹងតម្លៃ ១៤៥ដុល្លារកាលពីឆ្នាំ ២០១៩ ។

របាយការណ៍បញ្ជាក់ទៀតថា សេដ្ឋកិច្ចអាភៀននៅមីយ៉ាន់ម៉ា មានតម្លៃចន្លោះពី ៦៤១លានដុល្លារ ដល់ ១,០១ពាន់លានដុល្លារ ដែលស្មើនឹងប្រហែល ០,៩ភាគរយ ដល់ ១,៤ភាគរយនៃផលិតផលក្នុងស្រុកសរុបឆ្នាំ ២០២៤ របស់ប្រទេសមួយនេះ ៕