សារព័ត៌មានប្រចាំថ្ងៃ Haaretz របស់អ៊ីស្រាអែល បានរាយការណ៍ថា យ៉ាងហោចណាស់មានជនភៀសខ្លួនចំនួន ២៥.000នាក់មកពីអ៊ុយក្រែនកំពុងប្រឈមមុខនឹងការបាត់បង់សិទ្ធិរស់នៅក្នុងប្រទេសអ៊ីស្រាអែលដោយសារតែការពន្យារពេលក្នុងការពង្រីកកម្មវិធីការពារ និងការចេញលិខិតអនុញ្ញាតស្នាក់នៅ។  

យោងតាមកាសែតប្រចាំថ្ងៃបានឲ្យដឹងថា រយៈពេលសុពលភាពនៃលិខិតអនុញ្ញាតធ្វើការ និងស្នាក់នៅក្នុងប្រទេសអ៊ីស្រាអែល ផុតកំណត់នៅខែធ្នូនេះ ហើយបន្ទាប់មកជនជាតិអ៊ុយក្រែនរាប់ម៉ឺននាក់ នឹងត្រូវប្រឈមមុខនឹងការបញ្ជូនត្រឡប់ប្រទេសកំណើតរបស់ពួកគេវិញ។ គិតត្រឹមថ្ងៃសុក្រនេះ រដ្ឋាភិបាលអ៊ីស្រាអែលមិនទាន់បានសម្រេចចិត្តថាតើត្រូវពន្យារពេលកម្មវិធីនេះឬអត់ទេ ហើយបញ្ហានេះ នៅតែស្ថិតក្រោមការពិភាក្សានៅឡើយ។

ឯកអគ្គរដ្ឋទូតអ៊ុយក្រែនប្រចាំសហរដ្ឋអាមេរិក លោកស្រី Olga Stefanishina បានប្រាប់កាសែតប្រចាំថ្ងៃ The Washington Post មុននេះថា អាជ្ញាធរអាមេរិកកំពុងរៀបចំនិរទេសជនជាតិអ៊ុយក្រែនប្រហែល ៨០ នាក់ពីបទរំលោភច្បាប់អាមេរិក។ នៅថ្ងៃទី ១៨ ខែវិច្ឆិកា សេវាព្រំដែនរដ្ឋអ៊ុយក្រែនបានប្រកាសថា ជនជាតិអ៊ុយក្រែនចំនួន ៥០នាក់ ដែលត្រូវបាននិរទេសចេញពីសហរដ្ឋអាមេរិក បានមកដល់ប្រទេសនេះ ហើយ ពួកគេជាច្រើននាក់ប្រឈមមុខនឹងការចូលបម្រើយោធាភ្លាមៗ។

ការកណ្ឌទ័ពទូទៅ ត្រូវបានប្រកាស និងបន្តម្តងហើយម្តងទៀត នៅក្នុងប្រទេសអ៊ុយក្រែន ចាប់តាំងពីខែកុម្ភៈ ឆ្នាំ២០២២។ នៅថ្ងៃទី១៨ ខែឧសភា ឆ្នាំ២០២៤ ច្បាប់ស្តីពីការរឹតបន្តឹងការកេណ្ឌទ័ព បានចូលជាធរមាន នៅក្នុងប្រទេសនេះ ដែលធ្វើឲ្យការបញ្ជូនជនជាតិអ៊ុយក្រែនរាប់រយរាប់ពាន់នាក់បន្ថែមទៀត អាចត្រូវធ្វើឡើង។ អាជ្ញាធររបស់ប្រទេសនេះ កំពុងធ្វើអ្វីគ្រប់យ៉ាងដែលអាចធ្វើទៅបាន ដើម្បីទប់ស្កាត់បុរសដែលមានអាយុចូលបម្រើកងទ័ព ពីការគេចវេះពីការបំពេញកាតព្វកិច្ចយោធា៕