ក្រុមមន្ត្រីបានឲ្យដឹងថា ភ្លៀងបានធ្លាក់យ៉ាងខ្លាំងនៅប្រទេសស្រីលង្កា នាថ្ងៃសុក្រ (ទី៥ ខែធ្នូ) នេះ ដោយរារាំងដល់ប្រតិបត្តិការសម្អាត បន្ទាប់ពីទឹកជំនន់ធំខ្លាំង និងបំណាក់ដី កាលពីសប្តាហ៍មុន បានឆក់យកជីវិតមនុស្សជិត ៥០០នាក់។

អាជ្ញាធរបានរាយការណ៍ថា មានភ្លៀងធ្លាក់កម្រិតរហូតដល់ ១៣២មីលីម៉ែត្រ នៅភាគខាងត្បូងប្រទេស ក្នុងរយៈពេល ១៥ម៉ោង ដែលបានរាំងនៅយប់ថ្ងៃព្រហស្បតិ៍។ តែបើទោះបីទឹកមានកម្រិតខ្ពស់ខ្លាំង ក៏ពួកគេបានប្រាប់ថា ទឹកជំនន់ទ្រង់ទ្រាយធំដែលបានឃើញចាប់តាំងពីសប្តាហ៍មុនមកនោះ បានចាប់ផ្តើមស្រកចុះបណ្ដើរៗហើយ។

គួរបញ្ជាក់ថា មជ្ឈមណ្ឌលគ្រប់គ្រងគ្រោះមហន្តរាយ បានឲ្យដឹងថា មនុស្ស ៤៨៦នាក់ ត្រូវបានបញ្ជាក់ថា ស្លាប់ ហើយ ៣៤១នាក់ទៀតនៅតែមិនទាន់ត្រូវរកឃើញ បន្ទាប់ពីព្យុះស៊ីក្លូន Ditwah បានបោកបក់ចេញពីកោះនេះ កាលពីថ្ងៃសៅរ៍ចុងសប្ដាហ៍កន្លងទៅ។ ចំនួនប្រជាជននៅក្នុងជំរុំជនភៀសខ្លួនគ្រប់គ្រងដោយរដ្ឋ បានធ្លាក់ចុះមកត្រឹម ១៧០.០០០នាក់ ពីកម្រិតខ្ពស់បំផុត ២២៥.០០០នាក់ ខណៈដែលទឹកជំនន់បានស្រកទាំងនៅក្នុង និងជុំវិញរដ្ឋធានីកូឡុំបូ។

យ៉ាងណាក្ដី ប្រជាពលរដ្ឋដែលជម្លៀសខ្លួនចេញពីតំបន់ភ្នំភាគកណ្តាលដែលងាយរងគ្រោះដោយសារបំណាក់ដី ត្រូវបានប្រាប់កុំឲ្យត្រឡប់ទៅផ្ទះសម្បែងរបស់ពួកគេវិញភ្លាមៗ បើទោះបីជាពួកគេមិនរងប៉ះពាល់ដោយសារបំណាក់ដីក៏ដោយ ដោយសារតែតំបន់ភ្នំនៅតែមិនទាន់មានសុវត្ថិភាព។ នៅកណ្តាលទីក្រុង Gampola អ្នកស្រុកបាននាំគ្នាចាប់ផ្ដើមបោសសម្អាតភក់ និងទឹកកខ្វក់៕