មន្ត្រីអនុវត្តច្បាប់ជាន់ខ្ពស់ នៅក្នុងប្រទេសគុយបា បាននិយាយកាលពីថ្ងៃព្រហស្បតិ៍ (ទី៤ ខែធ្នូ) ថា កោះនេះកំពុងផ្តល់អាទិភាពដល់ការប្រយុទ្ធប្រឆាំងនឹងការជួញដូរគ្រឿងញៀន នៅតំបន់ការ៉ាអ៊ីប ហើយបន្តផ្តល់ព័ត៌មានដល់ឆ្មាំល្បាតឆ្នេរអាមេរិក ស្របពេលមានភាពតានតឹងកើនឡើង និងការបង្កើនវត្តមានយោធាអាមេរិក នៅក្នុងតំបន់នេះ។

គុយបា និងសហរដ្ឋអាមេរិក ក្នុងឆ្នាំ២០១៧ បានព្រមព្រៀងធ្វើកិច្ចសហប្រតិបត្តិការប្រយុទ្ធប្រឆាំងនឹងការជួញដូរគ្រឿងញៀន ប៉ុន្តែលោកវរសេនីយ៍ឯក Ybey Carballo ប្រធានឆ្មាំព្រំដែនគុយបា បានប្រាប់អ្នកសារព័ត៌មាននៅទីក្រុង Havana ថា ការព្រមព្រៀងផ្លូវការ រវាងប្រទេសជាគូប្រជែងយូរអង្វែងទាំង២ បានបញ្ចប់ក្រោមរដ្ឋបាលអាណត្តិទី២ របស់ប្រធានាធិបតីអាមេរិក លោក Donald Trump។

តែលោក Carballo បានបញ្ជាក់ថា ទោះបីជាយ៉ាងណានេះក្ដី ក៏ប្រទេសគុយបា តែងតែផ្តល់ឲ្យឆ្មាំល្បាតឆ្នេរអាមេរិកនូវព័ត៌មានស៊ើបការណ៍សម្ងាត់ ទីតាំង ផ្លូវ និងលក្ខណៈនៃទូកដែលសង្ស័យថា មានការជួញដូរគ្រឿងញៀន នៅក្បែរដែនទឹករបស់ខ្លួន។

លោក Carballo បាននិយាយថា «គុយបាមិនមែនជាទីតាំងលាក់ខ្លួន ដូចមនុស្សមួយចំនួននិយាយនោះទេ» ដោយលោកបន្ថែមថា វិធីសាស្រ្តដ៏សកម្មរបស់កោះនេះ បានរួមចំណែកទាំងផ្នែកសន្តិសុខក្នុងតំបន់ និង «ជាពិសេស សម្រាប់សហរដ្ឋអាមេរិក ពីព្រោះទូកតែងតែធ្វើដំណើរទៅទីនោះ»។

លោក Carballo បានបន្ថែមថា ប្រទេសគុយបាបានផ្តល់តម្រុយ និងការស៊ើបការណ៍សម្ងាត់ជាង ១.៥០០ ពាក់ព័ន្ធនឹងអ្នកជួញដូរគ្រឿងញៀន ដល់ល្បាតឆ្មាំឆ្នេរអាមេរិក ចន្លោះឆ្នាំ១៩៩០ ដល់ថ្ងៃទី៣០ ខែវិច្ឆិកា ឆ្នាំ២០២៥ ដែលជាភស្តុតាងបង្ហាញពីការប្តេជ្ញាចិត្តយូរអង្វែងរបស់កោះ ក្នុងការប្រយុទ្ធប្រឆាំងនឹងការជួញដូរគ្រឿងញៀន៕