មន្ត្រីជាន់ខ្ពស់ក្រុមហាម៉ាស នៅថ្ងៃសុក្រ (ទី៥ ខែធ្នូ) នេះ បានប្រាប់សារព័ត៌មាន Al Arabiya ថា ក្រុមសកម្មប្រយុទ្ធប៉ាឡេស្ទីនមួយនេះ មិនមានបំណងបន្តគ្រប់គ្រងតំបន់ហ្កាហ្សាស្ទ្រីបនោះឡើយ ហើយបញ្ជាក់ថា ខ្លួនបានយល់ព្រមរួចហើយ ចំពោះការបង្កើតគណៈកម្មាធិការបច្ចេកទេសធិបតេយ្យ ពោលគឺជាស្ថាប័នពិសេសមួយ ដើម្បីគ្រប់គ្រងដែនដីនេះ ក្នុងដំណាក់កាលបន្ទាប់។

មន្ត្រីរូបនេះ បានឲ្យដឹងទៀតថា ក្រុមហាម៉ាស បានយល់ព្រមចំពោះឈ្មោះដែលត្រូវបានស្នើឡើងទាំងអស់ សម្រាប់ស្ថាប័នបច្ចេកទេសធិបតេយ្យនេះ ដោយកត់សម្គាល់ថា មានកិច្ចព្រមព្រៀងផ្ទៃក្នុង នៅក្នុងបញ្ជីឈ្មោះនេះ។ លោកបានបន្ថែមថា ទោះបីជាមានវឌ្ឍនភាពក្នុងកិច្ចពិភាក្សាក្ដី ក៏អ៊ីស្រាអែល បាននិងកំពុងរារាំងការអនុវត្តជាក់ស្តែងនៃវិធានការដែលបានព្រមព្រៀងគ្នាជាមូលដ្ឋាន។

មន្ត្រីក្រុមហាម៉ាសរូបនេះ ក៏បានលើកឡើងផងដែរថា ការដាក់ពង្រាយកងកម្លាំងអន្តរជាតិ នឹងត្រូវបានកំណត់យ៉ាងតឹងរ៉ឹង ដើម្បីត្រួតពិនិត្យបទឈប់បាញ់ ជាជាងការគ្រប់គ្រងតំបន់ហ្កាហ្សា ឬចូលរួមក្នុងអភិបាលកិច្ចផ្ទៃក្នុង។ លោកបានពន្យល់ថា តួនាទីរបស់ពួកគេ គឺបែងចែកជា ៣ភាគី និងការពារកុំឲ្យមានប៉ះទង្គិចជាថ្មី។

លើសពីនោះទៀត លោកបានបន្ថែមថា បណ្ដារដ្ឋសម្រុះសម្រួល គាំទ្រការផ្តល់តួនាទីត្រួតពិនិត្យដល់កងកម្លាំងអន្តរជាតិ ដែលត្រូវបានដាក់ពង្រាយជាផ្នែកនៃការរៀបចំបទឈប់បាញ់៕