ប្រព័ន្ធផ្សព្វផ្សាយរដ្ឋ បានរាយការណ៍ថា កងទ័ពជើងទឹករបស់ឆ្មាំបដិវត្តន៍អ៊ីរ៉ង់ បានបាញ់មីស៊ីលបាលីស្ទិក និងតម្រង់គោលដៅ សំដៅទៅលើទីតាំងសន្មត នៅឈូងសមុទ្រ នាថ្ងៃសុក្រ (ទី៥ ខែធ្នូ) នេះ ក្នុងអំឡុងពេលធ្វើសមយុទ្ធយោធារយៈពេល ២ថ្ងៃ ដោយមានគោលបំណងប្រឆាំងនឹងការគំរាមកំហែងពីបរទេស។

នៅមុននេះ អ៊ីរ៉ង់បានធ្វើម្ចាស់រៀបចំសមយុទ្ធប្រឆាំងភេរវកម្ម ក្នុងខេត្តភាគពាយព្យរបស់ខ្លួន នៅភាគខាងកើតប្រទេសអាស៊ែបៃហ្សង់ ជាមួយសមាជិកនៃអង្គការសហប្រតិបត្តិការសៀងហៃ (SCO) ដែលយោងតាមទូរទស្សន៍រដ្ឋ បានឲ្យដឹងថា មានបំណងផ្តល់សញ្ញាទាំងសន្តិភាព និងមិត្តភាពដល់រដ្ឋជិតខាង ហើយព្រមានសត្រូវថា «ការបង្កើតនូវកំហុសឆ្គងណាមួយ នឹងជួបប្រទះជាមួយការឆ្លើយតបយ៉ាងដាច់ណាត់»។

គួរបញ្ជាក់ថា សមយុទ្ធទាំងកងទ័ពជើងគោក និងជើងទឹកនេះ កើតឡើងបន្ទាប់ពីមានសង្គ្រាមអាកាសរយៈពេល ១២ថ្ងៃ រវាងអ៊ីស្រាអែល និងអ៊ីរ៉ង់ កាលពីខែមិថុនា ជាពេលដែលសហរដ្ឋអាមេរិកបានចូលរួមជាមួយអ៊ីស្រាអែល ក្នុងការប្រហារលើទីតាំងនុយក្លេអ៊ែររបស់អ៊ីរ៉ង់។

ប្រព័ន្ធផ្សព្វផ្សាយរដ្ឋបានរាយការណ៍ពីការបាញ់បង្ហោះដ៏ធំនូវមីស៊ីលតម្រង់គោលដៅប្រភេទ Qadr 110, Qadr 380 និង Qadr 360 និងមីស៊ីលបាលីស្ទិកចំនួន ៣០៣គ្រាប់ សំដៅទៅលើគោលដៅនៅក្នុងឈូងសមុទ្រអូម៉ង់។ សេចក្ដីរាយការណ៍បានបន្ថែមថា យានដ្រូនបានវាយប្រហារក្នុងពេលដំណាលគ្នាលើមូលដ្ឋានសន្មតរបស់សត្រូវ។

កងទ័ពជើងទឹករបស់ IRGC (កងឆ្មាំបដិវត្តន៍ឥស្លាម) បានចាប់ផ្តើមសមយុទ្ធរបស់ខ្លួន ទាំងនៅក្នុងច្រកសមុទ្រយុទ្ធសាស្ត្រ Hormuz និងឈូងសមុទ្រអូម៉ង់ កាលពីថ្ងៃព្រហស្បតិ៍៕