និយតករសហភាពអឺរ៉ុប (EU) នៅថ្ងៃសុក្រ (ទី៥ ខែធ្នូ) នេះ បានពិន័យបណ្ដាញសង្គម X របស់លោក Elon Musk នូវទឹកប្រាក់ ១២០លានអឺរ៉ូ (១៤០លានដុល្លារ) ជុំវិញការរំលោភលើច្បាប់ឌីជីថលរបស់ប្លុកដែលមន្ត្រីទាំងនោះបានលើកឡើងថា អាចធ្វើអ្នកប្រើប្រាស់ប្រឈមនឹងការឆបោក និងការក្លែងបន្លំ។

គណៈកម្មការអឺរ៉ុប បានចេញសេចក្តីសម្រេចរបស់ខ្លួន បន្ទាប់ពីមានការស៊ើបអង្កេតដែលខ្លួនបានចាប់ផ្ដើមកាលពី ២ឆ្នាំមុន ចំពោះបណ្ដាញសង្គម X ក្រោមច្បាប់សេវាកម្មឌីជីថល (Digital Services Act) របស់ប្លុកដែលមានសមាជិក ២៧ប្រទេស។ ត្រូវបានគេស្គាល់ផងដែរដោយអក្សរកាត់ DSA ជាច្បាប់ដ៏ទូលំទូលាយដែលតម្រូវឲ្យកម្មវិធីបណ្ដាញសង្គមទទួលខុសត្រូវបន្ថែមទៀត ដើម្បីការពារអ្នកប្រើប្រាស់អឺរ៉ុប និងលុបមាតិកាដែលបង្កគ្រោះថ្នាក់ ឬខុសច្បាប់ នៅលើគេហទំព័ររបស់ពួកគេ ក្រោមគំរាមកំហែងផាកពិន័យយ៉ាងធ្ងន់ធ្ងរ។

គណៈកម្មការបានបញ្ជាក់ថា ខ្លួនកំពុងពិន័យបណ្ដាញសង្គម X (ពីមុន Twitter) ដោយសារតែការបំពានចំនួន ៣ករណីផ្សេងគ្នា លើការតម្រូវឲ្យមានតម្លាភាពរបស់ DSA។ ការសម្រេចនេះអាចធ្វើឲ្យមានការខឹងសម្បាពីលោកប្រធានាធិបតី Donald Trump ដែលរដ្ឋបាលរបស់លោក បានរិះគន់បទប្បញ្ញត្តិឌីជីថលរបស់ទីក្រុងប៊្រុចសែល ហើយបានប្តេជ្ញាសងសឹក ប្រសិនបើក្រុមហ៊ុនបច្ចេកវិទ្យាអាមេរិកត្រូវបានពិន័យ។

ក្រុមហ៊ុនរបស់បណ្ដាញសង្គមមួយនេះ មិនបានឆ្លើយតបភ្លាមៗនោះឡើយ ចំពោះសំណើតាមអ៊ីម៉ែល ដើម្បីសុំការអត្ថាធិប្បាយ។ និយតករបានឲ្យដឹងថា សញ្ញាធីកពណ៌ខៀវរបស់ X បានរំលោភច្បាប់ ដោយសារតែ «ការរចនាអាចនាំឲ្យយល់ខុស» ដែលអាចធ្វើអ្នកប្រើប្រាស់រងនូវការឆបោក និងក្លែងបន្លំ។ ហើយជាមួយគ្នានេះ និយតករបានបន្ថែមថា បណ្ដាញសង្គម X ក៏មិនបានអនុវត្តតាមលក្ខខណ្ឌតម្លាភាព សម្រាប់មូលដ្ឋានទិន្នន័យផ្សាយពាណិជ្ជកម្មរបស់ខ្លួនផងដែរ៕