តាមរយៈវីដេអូដែលត្រូវបានផ្សព្វផ្សាយនៅលើបណ្ដាញសង្គម នាយករដ្ឋមន្រ្តីអ៊ីស្រាអែល លោក Benjamin Netanyahu បានរិះគន់សំណុំរឿងពុករលួយដែលកំពុងបន្តមានលើរូបលោកថា ជា «ការកាត់ក្តី Bugs Bunny» (ការកាត់ក្ដីរបស់ទន្សាយ) ហើយបាននិយាយការពារការស្នើសុំលើកលែងទោសដ៏ចម្រូងចម្រាសរបស់លោក។

វីដេអូរយៈពេល ៣នាទីដែលត្រូវបានបញ្ចេញជាសាធារណៈ កាលពីល្ងាចថ្ងៃព្រហស្បតិ៍ (ទី៤ ខែធ្នូ) បានកើតឡើងមួយសប្តាហ៍បន្ទាប់ពីលោក Netanyahu បានស្នើសុំការលើកលែងទោសជាផ្លូវការពីប្រធានាធិបតីអ៊ីស្រាអែល លោក Isaac Herzog ដោយលើកហេតុផលថា ការកាត់ទោសរបស់លោកកំពុងធ្វើឲ្យប្រទេសបែកបាក់។ ប្រធានាធិបតីអាមេរិក លោក Donald Trump ក៏បានផ្ញើលិខិតមួយច្បាប់ កាលពីខែមុន ទៅកាន់លោក Herzog ដោយស្នើសុំដូចគ្នានេះដែរ។

នៅក្នុងវីដេអូដែលបានចែករំលែកតាមប្រព័ន្ធអ៊ីនធឺណិត កាលពីល្ងាចថ្ងៃព្រហស្បតិ៍ លោក Netanyahu បានរិះគន់រដំណើរការនីតិវិធីនេះថា ជា «ការកាត់ក្តីនយោបាយ» ដែលត្រូវបានរៀបចំឡើង ដើម្បីបង្ខំឲ្យលោកចុះចេញពីតំណែង ដោយបញ្ជាក់ឡើងវិញនូវការបដិសេធជាយូរមករបស់លោក ដែលថា លោកមិនបានប្រព្រឹត្តអ្វីខុសឡើយ។

គួរបញ្ជាក់ថា ការចោទប្រកាន់រួមមាន ២ករណីដែលលោក Netanyahu ត្រូវបានចោទប្រកាន់ថា បានចរចា ដើម្បីទទួលបានការផ្សាយល្អនៅលើបណ្តាញសារព័ត៌មានរបស់អ៊ីស្រាអែល និងទី៣ ពាក់ព័ន្ធនឹងការចោទប្រកាន់ដែលលោកបានទទួលយកអំណោយតម្លៃជាង ២៦០.០០០ដុល្លារ ដែលរួមមានបារី គ្រឿងអលង្ការ និងស្រាសំប៉ាញពីមហាសេដ្ឋី ជាថ្នូរនឹងគាំទ្រផ្នែកនយោបាយ។ ការចោទប្រកាន់អំពើពុករលួយករណីទី៤ ត្រូវបានច្រានចោល នៅមុននេះ៕