នៅថ្ងៃសុក្រនេះ ការប្រយុទ្ធគ្នាបានផ្ទុះឡើនៅភាគខាងកើតសាធារណរដ្ឋប្រជាធិបតេយ្យកុងហ្គោ រយៈពេល ១ថ្ងៃប៉ុណ្ណោះ ក្រោយប្រធានាធិបតីសហរដ្ឋអាមេរិកលោក Donald Trump ទទួលធ្វើជាម្ចាស់ផ្ទះក្រុមមេដឹកនាំកុងហ្គោ និងរ៉្វាន់ដា នៅទីក្រុងវ៉ាស៊ីនតោន ដើម្បីចុះហត្ថលេខាលើកិច្ចព្រមព្រៀងថ្មី មានគោលដៅបញ្ចប់ជម្លោះរយៈពេលជាច្រើនឆ្នាំនៅតំបន់សម្បូររ៉ែ ។

កាលពីថ្ងៃព្រហស្បតិ៍ម្សិលមិញ ប្រធានាធិបតីកុងហ្គោលោក Felix Tshisekedi និងប្រធានាធិបតីរ៉្វាន់ដាលោក Paul Kagame បានបញ្ជាក់ឡើងវិញពីការប្តេជ្ញាចិត្តរបស់ពួកគេចំពោះកិច្ចព្រមព្រៀងគំាទ្រដោយអាមេរិក ដែលបានឈានដល់កាលពីខែមិថុនា ដើម្បីធ្វើឲ្យមានស្ថិរភាពនៅកុងហ្គោ និងបើកផ្លូវសម្រាប់ការវិនិយោគរ៉ែបន្ថែមទៀតរបស់លោកខាងលិច ។

លោក Trumpដែលរដ្ឋបាលរបស់លោកបានអន្តរាគមន៍ជម្លោះជាច្រើននៅជុំវិញពិភពលោក ដើម្បីពង្រឹងសមត្ថភាពរបស់លោកក្នុងនាមជាអ្នកផ្សះផ្សាជាតិ និងជំរុញផលប្រយោជន៍ធុរកិច្ចរបស់សហរដ្ឋអាមេរិកនោះ និយាយថា ពួកយើងកំពុងដោះស្រាយសង្រ្គាមដែលកំពុងកើតឡើងអស់រយៈពេលច្រើនទសវត្សរ៍មកហើយ ។

ទោះបីជាយ៉ាងណាក៏ដោយ ការប្រយុទ្ធគ្នានៅតែបន្ត ដោយភាគីបង្កសង្រ្គាមដាក់ការស្តីបន្ទោសឲ្យគ្នាទៅវិញទៅមក ។

ក្រុមឧទ្ទាម M23គាំទ្រដោយរ៉្វាន់ដាដែលរឹបអូសបានទីក្រុងធំៗបំផុតចំនួន ២ នៅភាគខាងកើតកុងហ្គោកាលពីដើមឆ្នាំនេះ ហើយមិនអនុវត្តតាមកិច្ចព្រមព្រៀងរបស់ទីក្រុងវ៉ាស៊ីនតោន និយាយថា កងកម្លាំងភក្តីភាពជាមួយរដ្ឋាភិបាល បានបើកការវាយប្រហារទ្រង់ទ្រាយធំលើពួកគេ ៕