សម្រាប់លោក Effendi Basyaruddin ដែលជាអ្នកនេសាទវ័យ ៦៤ឆ្នាំ ទឹកជំនន់ និងបំណាក់ដីស្លាប់មនុស្សនៅខេត្ត Aceh កាលពីសប្តាហ៍កន្លងទៅ បានធ្វើឲ្យរូបលោកនឹកឃើញរបួសស្នាមរលកយក្សស៊ូណាមិ កាលពីរយៈពេល ២១ឆ្នាំមុន ពេលដែលរូបលោករត់រកប្រាសអាយុ ពេលដែលទឹកមហាសមុទ្រឡើងដល់ចំណោតថ្ម ហើយនិងវាយប្រហារទីក្រុងរបស់លោក ។

មនុស្សជិត ២០ម៉ឺននាក់ បានស្លាប់នៅខេត្ត Aceh ក្រោយការរញ្ជួយដីកម្រិត ៩,១រ៉ិចទ័រ វាយប្រហារខេត្តភាគខាងជើងមួយនេះ បង្កឲ្យមានរលកស៊ូណាមិមហាសមុទ្រឥណ្ឌាកាលពីថ្ងៃទី ២៦ ខែធ្នូ ឆ្នាំ ២០០៤ ។

លោក Effendi និយាយប្រាប់ទីភ្នាក់ងារព័ត៌មានរ៉យទ័រថា លោកបានឃើញរលកសមុទ្រខ្ពស់បំផុតអំឡុងពេលរលកយក្សស៊ូណាមិ វាមានកម្ពស់ប្រហែល ២០ម៉ែត្រ ប៉ុន្តែការជន់លិចពិតជាសាហាវខ្លាំងណាស់ វាបានធ្វើឲ្យភូមិក្លាយជាទន្លេ ។

លោកនឹកឃើញរបួសស្នាមមួយនេះ ក្រោយទឹកជំនន់ និងបំណាក់ដី បង្កឡើងដោយសារព្យុះស៊ីក្លូន វាយប្រហារខេត្តចំនួន ៣នៅកោះស៊ូម៉ាត្រា ។ មនុស្សជាង ៨០០នាក់បានស្លាប់នៅឥណ្ឌូនេស៊ី ក្នុងគ្រោះមហន្តរាយធម្មជាតិមួយនេះ រួមទាំងមនុស្សជាង ២០០នាក់ នៅក្នុងខេត្ត Aceh ហើយប្រព័ន្ធព្យុះបានសម្លាប់មនុស្សប្រហែល ២០០នាក់ផ្សេងទៀតនៅប្រទេសថៃ និងប្រទេសម៉ាឡេស៊ី ។

លោក Effendi ដែលផ្ទះរបស់លោកត្រូវបានទឹកជំនន់ហូរនាំយកទៅអស់ ហើយឥឡូវរស់នៅក្នុងសំពត់តង់ជិតមហាសមុទ្រនិយាយថា ពួកយើងមានរបួសស្នាមច្រើនណាស់ ។

លោក Effendi មិនមែនតែជាមនុស្សម្នាក់នោះទេដែលរងគ្រោះ ហើយបញ្ហាបានកើតមានដល់ភូមិដាច់ស្រយាលជាច្រើនទៀត ហើយការនាំជំនួយទៅកាន់អ្នកត្រូវការ បន្ថែមការឈឺចាប់មួយកម្រិតទៀតដល់អ្នកភូមិ ។

រដ្ឋាភិបាលកណ្តាលឥណ្ឌូនេស៊ី និយាយក្នុងសប្តាហ៍នេះថា ពួកគេនឹងគាំទ្រដល់រដ្ឋាភិបាលក្នុងស្រុក ហើយថវិកា ៣០លានដុល្លារ ត្រូវបានរៀបចំសម្រាប់ការជួយសង្រ្គោះគ្រោះមហន្តរាយ ហើយថវិកានេះនឹងបង្កើនបន្ថែមទៀត បើសិនជាត្រូវការ ៕