ក្រសួងការពារជាតិ នៃព្រះរាជាណាចក្រកម្ពុជា បានបន្តអំពាវនាវ​ឱ្យភាគី​ថៃ​ដោះលែ​ង​យោធិន​ទាំង​១៨​នាក់ ច្បាប់​មនុស្សធម៌អន្តរជាតិ ឱ្យបានឆាប់រហ័ស និង​ដោយ​សុខ​សុវត្ថិភាព ខណៈ​មក​ដល់​ថ្ងៃ​នេះ​មាន​រយៈពេល ១៣០ហើយ។

តាមរយៈបណ្ដាញសង្គមនៅថ្ងៃទី៦ ខែធ្នូ ឆ្នាំ២០២៥នេះ ក្រសួងការពារជាតិ​បានលើកឡើងថា «​ថ្ងៃ​នេះ​ជា ថ្ងៃទី១៣០ ហើយ ដែលវីរកងទ័ពកម្ពុជាចំនួន១៨រូប ត្រូវបានចាប់ខ្លួន និង​ដាក់​ឱ្យ​ស្ថិត​ក្រោម​ការឃុំគ្រងរបស់យោធាថៃ។»

កម្ពុជាអំពាវនាវឱ្យភាគីថៃគោរពឱ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដ នូវ​សេចក្តី​ថ្លែង​ការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ត្រង់កថាខណ្ឌទី៥ បាន​គូស​បញ្ជាក់​ថា “ភាគីថៃត្រូវដោះលែងយោធិនទាំង១៨នាក់របស់កម្ពុជាជាបន្ទាន់ដោយមិនបង្អែបង្អង់” ព្រម​ទាំងគោរពនិងអនុវត្តនូវរាល់កាតព្វកិច្ចទាំងឡាយនៅក្រោមច្បាប់អន្តរជាតិ ជា​ពិសេស​ច្បាប់​មនុស្ស​ធម៌​អន្តរជាតិ ដោយដោះលែងវីរកងទ័ពកម្ពុជាឱ្យបានឆាប់រហ័សជាទីបំផុត ដើម្បី​ពួក​គាត់​អាច​វិល​ត្រឡប់មកជួបជុំក្រុមគ្រួសារវិញ ប្រកបដោយសុខសុវត្ថិភាព។

សូមគូសបញ្ជាក់ផងដែរថា រាជរដ្ឋាភិបាលកម្ពុជា បាននឹងកំពុង​ធ្វើ​ការ​យ៉ាង​សស្រាក់​សស្រាំ​ឥត​ឈប់​ឈរ ដោយបានប្រើប្រាស់គ្រប់មធ្យោបាយនិងយន្តការដោះស្រាយទាំងអស់ ដើម្បី​ទាម​ទារ​ឱ្យ​ភាគី​ថៃ​ដោះលែងវីរកងទ័ពរបស់យើងទាំង១៨នាក់នោះ ឱ្យបានឆាប់រហ័សជាទីបំផុត និង​ដោយ​សុខ​សុវត្ថិភាព​។

រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិន​ដែល​បោះ​បង់​កង​ទ័ព​របស់​យើង​ណាម្នាក់​ចោល​នោះឡើយ មិនថាក្នុងកាលៈទេសៈណាក៏ដោយ៕