យោងតាមសេចក្តីថ្លែងការណ៍រួមដែលបានចេញដោយឡែកពីគ្នាដោយ លោក Umerov និងក្រសួងការបរទេសសហរដ្ឋអាមេរិកបានឲ្យដឹងថា ប្រេសិតពិសេសរបស់ប្រធានាធិបតីសហរដ្ឋអាមេរិក Donald Trump បានបើក «កិច្ចពិភាក្សាប្រកបដោយស្ថាបនា» ជាមួយអ្នកចរចាជាន់ខ្ពស់របស់អ៊ុយក្រែន លោក Rustem Umerov នៅទីក្រុង Miami រដ្ឋ Florida កាលពីថ្ងៃសុក្រ ទី៥ ខែធ្នូ។

សេចក្តីថ្លែងការណ៍ និយាយថា «ក្នុងរយៈពេលពីរថ្ងៃ ប្រេសិតពិសេសសម្រាប់សន្តិភាព លោក Steven Witkoff និងលោក Jared Kushner បានជួបជាមួយរដ្ឋមន្ត្រីក្រុមប្រឹក្សាសន្តិសុខនិងការពារជាតិអ៊ុយក្រែន លោក Rustem Umerov និងនាយសេនាធិការ ឧត្តមសេនីយ៍ Andriy Hnatov សម្រាប់កិច្ចពិភាក្សាប្រកបដោយស្ថាបនាលើការជំរុញមាគ៌ាដ៏គួរឱ្យទុកចិត្តឆ្ពោះទៅរកសន្តិភាពយូរអង្វែងនិងយុត្តិធម៌នៅក្នុងប្រទេសអ៊ុយក្រែន»។ ក្រុមនេះមានកិច្ចប្រជុំលើកទី៦ របស់ខ្លួនក្នុងរយៈពេលពីរសប្តាហ៍កន្លងទៅនេះ។

រដ្ឋមន្ត្រី លោក Umerov បានបញ្ជាក់ជាថ្មីថា អាទិភាពរបស់អ៊ុយក្រែនគឺការទទួលបានដំណោះស្រាយដែលការពារឯករាជ្យភាព និងអធិបតេយ្យភាពរបស់ខ្លួន ធានាបានសុវត្ថិភាពរបស់ប្រជាជនអ៊ុយក្រែន និងផ្តល់មូលដ្ឋានដ៏រឹងមាំសម្រាប់អនាគតប្រជាធិបតេយ្យដោយវិបុលភាព»។ 

ប្រភពដដែលបាននិយាយថា កិច្ចប្រជុំរបស់សហរដ្ឋអាមេរិក ដែលធ្វើឡើងនៅទីតាំងដែលពុំបានបង្ហាញនៅក្នុងទីក្រុង Miami ពុំមែនជាកិច្ចប្រជុំចរចាផ្លូវការដែលផ្តោតលើផែនការសន្តិភាពគាំទ្រដោយសហរដ្ឋអាមេរិកនោះទេ។ សេចក្តីថ្លែងការណ៍និយាយថា ភាគីទាំងពីរនឹងជួបប្រជុំគ្នាម្តងទៀតនៅថ្ងៃសៅរ៍ ទី៦ ខែធ្នូនេះ ដើម្បីបន្តជំរុញកិច្ចពិភាក្សា។