ប្រធានាធិបតីប្រទេសលីបង់កាលពីថ្ងៃសុក្រ ទី៥ ខែធ្នូ បានការពារការសម្រេចចិត្តរបស់លោកដើម្បីពង្រីកកិច្ចចរចាជាមួយអ៊ីស្រាអែល ជាមធ្យោបាយមួយដើម្បីបញ្ចៀសអំពើហិង្សាបន្ថែមទៀត ប៉ុន្តែប្រធានក្រុមប្រដាប់អាវុធហេសបូឡា បានចាត់ទុកវាថាវាជាកំហុសឆ្គង។

អ៊ីស្រាអែល និងលីបង់ ប្រទេសទាំងពីរនេះបានបញ្ជូនបេសកជនស៊ីវិលទៅកាន់គណៈកម្មាធិការយោធា ដើម្បីត្រួតពិនិត្យបទឈប់បាញ់របស់ខ្លួន ជាចំណាត់ការមួយឆ្ពោះទៅរកការទាមទាររបស់សហរដ្ឋអាមេរិកដែលមានរយៈពេលច្រើនខែមកហើយ ដែលប្រទេសទាំងពីរពង្រីកកិច្ចចរចា ស្របតាមរបៀបវារៈសន្តិភាពនៅតំបន់មជ្ឈិមបូព៌ារបស់លោកប្រធានាធិបតី Donald Trump ។

ប្រធានាធិបតី លោក ចូសេហ្វ អោន បានប្រាប់អ្នកតំណាងក្រុមប្រឹក្សាសន្តិសុខអង្គការសហប្រជាជាតិ ដែលមកធ្វើទស្សនកិច្ចថា ប្រទេសរបស់លោក «បានអនុម័តជម្រើសនៃការចរចាជាមួយអ៊ីស្រាអែល» ហើយ «គ្មានការត្រឡប់ក្រោយឡើយ»។

លោក អោន បាននិយាយនៅក្នុងសេចក្តីថ្លែងការណ៍កាលពីថ្ងៃសុក្រថា «ការចរចាទាំងនេះ ភាគច្រើនមានគោលបំណងបញ្ឈប់សកម្មភាពអរិភាពដែលធ្វើឡើងដោយអ៊ីស្រាអែលនៅលើទឹកដីលីបង់ ធានាបានការវិលត្រឡប់មកវិញរបស់ឈ្លើយសឹក កំណត់ពេលដកទ័ពចេញពីតំបន់ដែលបានចូលកាន់កាប់ និងដោះស្រាយចំណុចជម្លោះតាមបណ្តោយខ្សែបន្ទាត់ខៀវ» ដោយនិយាយសំដៅទៅលើខ្សែបន្ទាត់ដែលគូសផែនទីដោយអង្គការសហប្រជាជាតិបំបែកអ៊ីស្រាអែលចេញពីលីបង់។

ប៉ុន្តែការចរចាដែលបានពង្រីកនេះ ត្រូវបានរិះគន់ដោយក្រុមប្រដាប់អាវុធហេសបូឡា។ ប្រធានក្រុម លោក Naim Qassem បាននិយាយកាលពីរសៀលថ្ងៃសុក្រថា ការបញ្ជូនគណៈប្រតិភូស៊ីវិលទៅកាន់គណៈកម្មាធិការត្រួតពិនិត្យបទឈប់បាញ់គឺជា «កំហុសឆ្គង» ហើយបានជំរុញឱ្យរដ្ឋាភិបាលពិចារណាឡើងវិញនូវការសម្រេចចិត្តរបស់ខ្លួន។