ការប្រយុទ្ធគ្នា បានផ្ទុះឡើងជាថ្មីម្តងទៀតនៅភាគខាងកើតសាធារណរដ្ឋប្រជាធិបតេយ្យកុងហ្គោ រវាងក្រុមឧទ្ទាម M23 និងកងកម្លាំងរដ្ឋាភិបាល មួយថ្ងៃបន្ទាប់ពីប្រធានាធិបតីសហរដ្ឋអាមេរិក លោក Donald Trump បានធ្វើជាម្ចាស់ផ្ទះស្វាគមន៍មេដឹកនាំសាធារណរដ្ឋប្រជាធិបតេយ្យកុងហ្គោ និងរ៉្វាន់ដា នៅទីក្រុងវ៉ាស៊ីនតោន ខណៈមេដឹកនាំប្រទេសទាំងពីរបានចុះហត្ថលេខាលើកិច្ចព្រមព្រៀងសន្តិភាពក្នុងគោលបំណងបញ្ចប់ជម្លោះរយៈពេលជាច្រើនទសវត្សរ៍នៅក្នុងប្រទេស។

ភាគីជម្លោះបានស្តីបន្ទោសគ្នាទៅវិញទៅមក ចំពោះការប្រយុទ្ធគ្នាជាថ្មីកាលពីថ្ងៃសុក្រ ដោយក្រុម M23 បាននិយាយនៅក្នុងសេចក្តីថ្លែងការណ៍ថា មនុស្ស២៣នាក់ត្រូវបានសម្លាប់និងជាច្រើននាក់ទៀតរងរបួសនៅក្នុងការទម្លាក់គ្រាប់បែករបស់កងទ័ពសាធារណរដ្ឋប្រជាធិបតេយ្យកុងហ្គោ។

អ្នកនាំពាក្យរបស់ក្រុម M23 លោក Lawrence Kanyuka បាននិយាយនៅក្នុងការបង្ហោះមួយនៅលើបណ្តា្ X ថា កងកម្លាំងកុងហ្គោ និងសម្ព័ន្ធមិត្ត បានបើកការវាយប្រហារលើតំបន់ដែលមានប្រជាជនរស់នៅច្រើននៅភាគខាងជើងខេត្ត North Kivu និង South Kivu ដោយប្រើប្រាស់យន្តហោះចម្បាំង យានដ្រូន និងកាំភ្លើងធំធុនធ្ងន់។

ក្រុមដែលគាំទ្រដោយប្រទេសរ៉្វាន់ដា បានដណ្តើមយកទីក្រុងធំបំផុតចំនួនពីររបស់សាធារណរដ្ឋប្រជាធិបតេយ្យកុងហ្គោភាគខាងកើតគឺទីក្រុង Goma និងទីក្រុង Bukavu កាលពីដើមឆ្នាំនេះ ហើយពុំត្រូវបានចងភ្ជាប់ទៅកិច្ចព្រមព្រៀងសន្តិភាពរបស់សហរដ្ឋអាមេរិកទេ។