រដ្ឋមន្ត្រីការបរទេសមកពីប្រទេសអារ៉ាប់និងមូស្លីមជាច្រើនប្រទេស កាលពីថ្ងៃសុក្របានសម្តែងការព្រួយបារម្ភរបស់ខ្លួនចំពោះការនិយាយលើកឡើងកាលពីពេលថ្មីៗរបស់អ៊ីស្រាអែលដែលបង្ហាញថាច្រកទីក្រុង Rafah នឹងត្រូវបានបើកឡើងវិញតែមួយច្រកប៉ុណ្ណោះ ដើម្បីផ្ទេរប្រជាជនតំបន់ហ្កាហ្សាចូលទៅក្នុងប្រទេសអេហ្ស៊ីប។

នៅក្នុងសេចក្តីថ្លែងការណ៍រួម រដ្ឋមន្ត្រីការបរទេសមកពីអារ៉ាប់រួម អេហ្ស៊ីប ហ្ស៊កដានី ឥណ្ឌូនេស៊ី ប៉ាគីស្ថាន ទួរគី អារ៉ាប៊ីសាអ៊ូឌីត និងប្រទេសកាតា បានបដិសេធបំណងណាមួយដើម្បីបណ្តេញប្រជាជនប៉ាឡេស្ទីនដោយបង្ខំ ហើយបានអំពាវនាវឱ្យប្រកាន់ខ្ជាប់ចំពោះផែនការដែលស្នើឡើងដោយប្រធានាធិបតីសហរដ្ឋអាមេរិក លោក Donald Trump ដែលពួកគេបាននិយាយថា តម្រូវឱ្យច្រក Rafah នៅតែបើកចំហក្នុងទិសដៅទាំងពីរដើម្បីធានាបានសេរីភាពនៃការធ្វើដំណើរសម្រាប់ប្រជាជនតំបន់ហ្កាហ្សា។

សេចក្តីថ្លែងការណ៍ បានសង្កត់ធ្ងន់ថាផែនការនេះ មានគោលបំណងអនុញ្ញាតឱ្យប្រជាជនប៉ាឡេស្ទីន ស្នាក់នៅតែលើដែនដីរបស់ពួកគេ និងចូលរួមក្នុងការកសាងតំបន់របស់ពួកគេឡើងវិញ ខណៈស្តារស្ថិរភាព និងធ្វើឲ្យប្រសើរស្ថានភាពមនុស្សធម៌។ រដ្ឋមន្ត្រី បានសង្កត់ធ្ងន់លើសារៈសំខាន់នៃការបន្តបទឈប់បាញ់ ការបន្ធូរបន្ថយទុក្ខលំបាករបស់ជនស៊ីវិល ការធានាបានដំណើការមនុស្សធម៌ដោយគ្មានការរឹតត្បិត និងការចាប់ផ្តើមកិច្ចខិតខំប្រឹងប្រែងស្តារឡើងវិញ និងកសាងឡើងវិញជាដំបូង។ អ៊ីស្រាអែល បានប្រកាសកាលពីថ្ងៃពុធសប្តាហ៍នេះថា ខ្លួននឹងបើកច្រកឆ្លងកាត់ឡើងវិញក្នុងរយៈពេលប៉ុន្មានថ្ងៃខាងមុខនេះ ក្រោមកិច្ចព្រមព្រៀងបទឈប់បាញ់កាលពីខែតុលាជាមួយក្រុមហាម៉ាស ប៉ុន្តែបាននិយាយថា ខ្លួននឹងដំណើរការតែមួយច្រកប៉ុណ្ណោះ ដោយអនុញ្ញាតឱ្យប្រជាជនប៉ាឡេស្ទីនចាកចេញពីតំបន់ហ្កាហ្សា ប៉ុន្តែមិនអាចត្រឡប់មកវិញបានទេ។ រដ្ឋាភិបាលអេហ្ស៊ីបបានច្រានចោលការសម្របសម្រួលជាមួយអ៊ីស្រាអែលលើការបើកច្រកឆ្លងកាត់បែបនេះឡើងវិញ។