ចាប់តាំងពីមានបទឈប់បាញ់រវាងអ៊ីស្រាអែល និងក្រុមហាម៉ាស បានចូលជាធរមាននៅក្នុងតំបន់ហ្កាហ្សាកាលពីខែតុលាមក តំបន់នេះបានជួបប្រទះនឹងកង្វះខាតការផ្គត់ផ្គង់ឧស្ម័នយ៉ាងធ្ងន់ធ្ងរ។ នេះបើយោងតាមការិយាល័យប្រព័ន្ធផ្សព្វផ្សាយរដ្ឋាភិបាលដែលគ្រប់គ្រងដោយក្រុមហាម៉ាស នៅថ្ងៃសៅរ៍នេះ។

រថយន្តដឹកជញ្ជូនឧស្ម័នសរុបចំនួន ៦៦០គ្រឿង ត្រូវបានគ្រោងនឹងចូលទៅក្នុងតំបន់ហ្កាហ្សាដំបូងឡើយ ប៉ុន្តែគិតត្រឹមពេលនេះ មានតែ ១០៤គ្រឿង ឬប្រហែល ១៦ ភាគរយនៃបរិមាណផ្គត់ផ្គង់ ដែលបានព្រមព្រៀងគ្នាប៉ុណ្ណោះដែលត្រូវបានអនុញ្ញាតឲ្យចូល។

ការិយាល័យប្រព័ន្ធផ្សព្វផ្សាយ បាននិយាយថា ឧស្ម័ននៅតំបន់ហ្កហ្សា ត្រូវបានបែងចែកដោយផ្អែក         លើចំនួនគ្រួសារដែលបានចុះបញ្ជី។ បច្ចុប្បន្ននេះ ប្រជាជនប្រហែល ២៥២.000គ្រួសារ បានទទួលចំណែករបស់ពួកគេ ខណៈដែលគោលដៅផ្គត់ផ្គង់ គឺប្រហែល ៤៧០.000 គ្រួសារ ដែលធ្វើឲ្យគ្រួសារមួយចំនួនធំ មិនអាចទទួលបានការផ្គត់ផ្គង់ឧស្ម័ន។ ដោយសារតែកង្វះខាតការផ្គត់ផ្គង់ជាបន្តបន្ទាប់ វានឹងចំណាយពេលយ៉ាងហោចណាស់ បីខែ ដើម្បីបញ្ចប់ការចែកចាយដល់គ្រួសារ ដែលបានចុះបញ្ជីទាំងអស់៕