កណ្ដាល៖​​ដើម្បីបុព្វហេតុ ការពារថែរក្សាបុរាណដ្ឋាន មន្រី្តជំនាញក្រសួងវប្បធម៌ និងវិចិត្រសិល្បៈ អាជ្ញាធរពាក់ព័ន្ធ បានចុះបង្គោលការពារបុរាណដ្ឋាន លើទួលព្រៃព្រះវិហារ នៅឃុំត្បែង ស្រុកកណ្តាលស្ទឹង ខេត្តកណ្តាល នាថ្ងៃទី២៣ ខែកុម្ភះ ឆ្នាំ២០២២នេះ។

សកម្មភាពចុះបង្គោលការពារបុរាណដ្ឋានខាងលើនេះ ដោយមានការចង្អុលបង្ហាញពីលោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ។ ដូច្នេះលោក វឿន វុទី្ធ ប្រធាននាយកដ្ឋានបុរាណវិទ្យា និងបុរេប្រវតិ្តសាស្រ្ត និងមានការចូលរួមពីស្ថាប័នពាក់ព័ន្ធ ដូចជានគរបាលការពារបេតិកភណ្ឌខេត្តកណ្តាល នគរបាលប៉ុស្តិ៍ អភិបាលរងស្រុក មេឃុំ មេភូមិ ប្រធានមនី្ទរវប្បធម៌ និងវិចិត្រសិល្បៈខេត្តកណ្តាល ធ្វើឡើងក្នុងគោលបំណងការពារបុរាណដ្ឋាន ដោយធ្វើការបោះបង្គោលដែនរក្សាការពារក្នុងទំហំផ្ទៃដីជាង៤០០០ម៉ែត្រការ៉េ និងដើម្បីបើកផ្លូវឲ្យប្រជាជនធ្វើការអភិវឌ្ឍនៅជុំវិញទីទួលព្រៃព្រះវិហារនេះផងដែរ។ ព្រោះបុរាណដ្ឋាន គឺមានដូចជាគ្រឹះប្រាសាទ ទួលកប់ខ្មោច ទួលគោរពបូជា និងមនុស្សសម័យមុនតាំងទីលំនៅ។ ដូច្នេះប្រជាជនគ្រប់រូបត្រូវថែរក្សាសម្បតិ្តវប្បធម៌ទាំងអស់នេះ សម្រាប់ទុកជាភស្តុតាង។ 

សូមបញ្ជាក់ផងដែរថា សមិទ្ធផលការងារឆ្នាំ២០២១ ដែលនាយកដ្ឋានសម្រេចបាន រួមមានការបោះបង្គោលការពារ នៅខេត្តកំពង់ឆ្នាំង ខេត្តស្ទឹងត្រែង ខេត្តស្វាយរៀង និងខេត្តក្រចេះ បានចំនួន៥៣ស្ថានីយ, ចុះពិនិត្យផ្ទៀងផ្ទាត់ កំណត់ទំហំដែនការពារ និងនិយាមការស្ថានីយបុរាណ បានចំនួន២៨ស្ថានីយ នៅស្រុកអន្លង់វែង ខេត្តឧត្តរមានជ័យ(កំពុងធ្វើប្លង់ដែនការពារ និងសលាកបត្រ), ចុះកំណាយស្រាវជ្រាវបុរាណដ្ឋាន តំបន់អ្នកតាធំ នៅភូមិក្បាលដំរី ឃុំអន្សាចំបក់ ស្រុកក្រគរ ខេត្តពោធិ៍សាត់ និងគម្រោងវិភាគវត្ថុសិល្បៈ បានមកពីកំណាយនៅខេត្តពោធិ៍សាត់ បានបញ្ចប់ការលាងសម្អាត និងកំពុងបិទផ្គុំបំណែកសមុច្ច័យ។ ដោយឡែកការងារផ្សព្វផ្សាយ ចុះពិនិត្យ និងផ្ទៀងផ្ទាត់ កំណត់ទីតាំងស្ថានីយបុរាណដែលប្រឈមបានចំនួន២៨៧ស្ថានីយ, ការផលិតបង្គោលសម្រាប់បោះការពារស្ថានីយបុរាណដែលប្រឈមបានចំនួន២៨៨បង្គោល, ការធ្វើកំណាយសង្រ្គោះស្ថានីយបុរាណដែលប្រឈម បានចំនួន៥ស្ថានីយ និងការផ្សព្វផ្សាយច្បាប់ និងបទដ្ឋានគតិយុតិ្ត ស្តីពីកិច្ចការពារបេតិកភណ្ឌបានចំនួន៤ស្រុក-ក្រុង ដោយធ្វើការផ្សព្វផ្សាយនៅសាលាស្រុក និងលើទីតាំងស្ថានីយផ្ទាល់៕អត្ថបទ៖រដ្ឋា