អ្នកគាំទ្រមេដឹកនាំប្រឆាំងវ៉េណេស៊ុយអេឡា លោកស្រី María Corina Machado បានដើរហែក្បួនកាលពីថ្ងៃសៅរ៍ នៅក្នុងទីក្រុងជាច្រើនទូទាំងពិភពលោក ដើម្បីរំលឹកដល់ជ័យជម្នះរង្វាន់ណូបែលសន្តិភាពរបស់លោកស្រី មុនពេលពិធីប្រគល់រង្វាន់ដ៏មានកិត្យានុភាព នៅសប្តាហ៍ក្រោយ។

មនុស្សជាច្រើន បានដើរហែក្បួនឆ្លងកាត់ទីក្រុងម៉ាឌ្រីដ ទីក្រុងយូត្រិច ទីក្រុងប៊ុយណូស៊ែរ ទីក្រុងលីម៉ា និង      ទីក្រុងដទៃទៀត ដើម្បីគាំទ្រលោកស្រី Machado ដែលអង្គការរបស់លោកស្រី ចង់ប្រើប្រាស់ការចាប់អារម្មណ៍ដែលទទួលបានពីពានរង្វាន់នេះ ដើម្បីបញ្ជាក់ពីសេចក្តីប្រាថ្នាប្រជាធិបតេយ្យរបស់ប្រទេសវ៉េណេស៊ុយអេឡា។ អង្គការនេះ រំពឹងថា នឹងមានការដើរហែក្បួននេះ នៅក្នុងទីក្រុងជាង ៨០ នៅជុំវិញពិភពលោក នៅថ្ងៃសៅរ៍។

ហ្វូងមនុស្សនៅទីក្រុងលីម៉ា បានកាន់រូបថតលោកស្រី Machado ហើយទាមទារឲ្យ «វ៉េណេស៊ុយអេឡាមានសេរីភាព»។ ដោយមានទង់ជាតិពណ៌លឿង ខៀវ និងក្រហមរបស់ប្រទេសនេះ រុំលើខ្នងរបស់ពួកគេ ឬបិទនៅលើមួករបស់ពួកគេ ក្រុមអ្នកទាំងទាំងនោះ បានកាន់ផ្ទាំងបដាដែលសរសេរថា «រង្វាន់ណូបែល គឺមកពីប្រទេសវ៉េណេស៊ុយអេឡា»។

អ្នកស្រី Verónica Durán ជនជាតិវ៉េណេស៊ុយអេឡា ដែលបានរស់នៅក្នុងទីក្រុងលីម៉ា អស់រយៈពេល ៨ ឆ្នាំមកហើយ បាននិយាយថា រង្វាន់ណូបែលសន្តិភាពរបស់លោកស្រី Machado ត្រូវបានអបអរសាទរ ពីព្រោះ «វាតំណាងឲ្យប្រជាជនវ៉េណេស៊ុយអេឡាទាំងអស់ អ្នកស្លាប់ក្នុងសមរភូមិ និងអ្នកទោសនយោបាយ ក្នុងការតស៊ូរបស់ពួកគេ ដើម្បីស្តារលទ្ធិប្រជាធិបតេយ្យឡើងវិញ»៕