បេសកជនអាមេរិក ទទួលបន្ទុកអ៊ុយក្រែន ដែលជិតចាកចេញពីតំណែង លោក Keith Kellogg បាននិយាយថា កិច្ចព្រមព្រៀងដើម្បីបញ្ចប់សង្រ្គាមអ៊ុយក្រែនគឺ «ពិតជាជិតសម្រេចបានហើយ» ហើយអាស្រ័យលើការដោះស្រាយបញ្ហាធំៗចំនួនពីរទៀតប៉ុណ្ណោះ ប៉ុន្តែវិមានក្រឹមឡាំង និយាយថា ត្រូវតែមានការផ្លាស់ប្តូរសំខាន់ៗចំពោះសំណើមួយចំនួនរបស់សហរដ្ឋអាមេរិក។

ប្រធានាធិបតីអាមេរិក លោគ Donald Trump បាននិយាយថា ការបញ្ចប់ជម្លោះនៅអ៊ុយក្រែន ដែលជាសង្រ្គាមបង្ហូរឈាមបំផុតរបស់អឺរ៉ុបចាប់តាំងពីសង្គ្រាមលោកលើកទី២ មកទល់ពេលនេះ គឺជាគោលដៅគោលនយោបាយការបរទេសដែលពិបាកសម្រេចបានបំផុតនៃតំណែងប្រធានាធិបតីរបស់លោក។

ប្រេសិតពិសេស លោក Keith Kellogg ដែលនឹងត្រូវចុះពីតំណែងក្នុងខែមករាខាងមុខ បានប្រាប់វេទិកាការពារជាតិ Reagan ថា កិច្ចប្រឹងប្រែងដោះស្រាយជម្លោះនៅអ៊ុយក្រែន ខិតកាន់តែជិតហើយ ពោលគឺនៅចម្ងាយ "១០ម៉ែត្រចុងក្រោយប៉ុណ្ណោះ" ប៉ុន្តែ នោះក៏តែងតែជាជំហានដ៏ពិបាកបំផុតដែរ។

លោក Kellogg បន្តថា បញ្ហាធំៗពីររឿងទឹកដី ពោលគឺ ជាចម្បងរឿងអនាគតនៃតំបន់ Donbas ដ៏ធំនិងអនាគតនៃរោងចក្រថាមពលនុយក្លេអ៊ែរធំបំផុតរបស់អឺរ៉ុប Zaporizhzhia របស់អ៊ុយក្រែន ដែលស្ថិតក្រោមការគ្រប់គ្រងរបស់រុស្ស៊ី។

ទន្ទឹមនឹងនេះ លោក Yuri Ushakov មន្រ្តីគោលនយោបាយការបរទេសនៅវិមានក្រឹមឡាំង កាលពីថ្ងៃអាទិត្យបាននិយាយថា អាមេរិកនឹងត្រូវតែ "កែប្រែចំណុចម៉ឺងម៉ាត់និងសំខាន់ៗចំពោះឯកសាររបស់ពួកគេ" ស្ដីពីសំណើសន្តិភាពអ៊ុយក្រែន។ លោកមិនបញ្ជាក់ឡើយថា ការផ្លាស់ប្តូរអ្វីខ្លះដែលរុស្ស៊ីចង់បាន៕