​សហរដ្ឋអាមេរិក៖ ការ​សម្រេច​ចិត្ត​របស់​ប្រធានាធិបតី​រុស្ស៊ី​លោក Vladimir Putin ក្នុង​ការ​ទទួលស្គាល់​ឯករាជ្យ​ភាព​លើ​តំបន់​ផ្ដាច់​ខ្លួន​ចំនួន​ពីរ​នៅ​ភាគ​ខាងកើត​អ៊ុយ​ក្រែ​ន និង​ការ​បញ្ជូន​កងទ័ព​ទៅកាន់​ទឹកដី​ទាំងនោះ បាន​នាំ​ឲ្យ​មានការ​ស្តី​បន្ទោស​យ៉ាង​ខ្លាំង​ក្លា​ថា​ ជា​ការ​កើន​ឡើង​ដ៏​ធ្ងន់ធ្ងរ និង​ជា​ការ​បំពានច្បាប់​អន្តរជាតិ​។​

​ប៉ុន្តែ​នៅ​ក្នុង​សហរដ្ឋអាមេរិក ជាទី​ដែល​លោក​ប្រធានាធិបតី Joe Biden បាន​ចាប់ផ្ដើម​ដាក់ទណ្ឌកម្ម​លើ​ធនាគារ​រុស្ស៊ី និងឥស្សរជន មិន​មាន​ការ​យល់​ស្រប​ច្បាស់លាស់​អំពី​របៀប​ដែល​រដ្ឋាភិបាល​គួរ​ឆ្លើយតប ​ចំពោះ​ទង្វើ​របស់​រុស្ស៊ី​នោះ​ទេ​។ ​ក្រុម​សមាជិកសភា​ដែល​មាន​ច​រឹត​ប្រកាន់​តឹងកំពុង​អំពាវនាវ​ឱ្យ​មាន​ការ​ដាក់ទណ្ឌកម្ម​ដ៏​ធ្ងន់ធ្ងរ​បំផុត​ របស់​សហរដ្ឋអាមេរិក​នៅ​ពេល​នេះ ខណៈ​ដែល​អ្នក​ផ្សេងទៀត​អះ​អាង​ថា ទីក្រុង​វ៉ាស៊ីនតោនគួរតែ​ផ្អាកទណ្ឌកម្ម​ដ៏​ធ្ងន់ធ្ងរ​បំផុត​សិន ​ដើម្បី​ទប់ស្កាត់​ការឈ្លានពាន​បន្ថែម​ទៀត​ពី​សំណាក់​ទីក្រុង​មូស្គូ​​។​

​លោក Matthew Pauly សាស្ត្រាចារ្យ​រង​ផ្នែក​ប្រវត្តិសាស្ត្រ​នៅ​សាកលវិទ្យាល័យ Michigan State University បាន​និយាយ​ថា ការ​ដាក់​ទណ្ឌកម្ម​បន្ថែមអាច​សម​ហេតុ​សម​ផល ព្រោះ​វិធីសាស្ត្រ​បែប​នេះ​នឹង​បង្កើត​បាន​ជា​មាត្រដ្ឋាន​ទណ្ឌកម្ម និង​ទប់​ការ​ជំរុញ​ទឹកចិត្ត​នា​ពេល​អនាគត សម្រាប់​ចលនា​របស់​រុស្ស៊ី​ដែល​ចេះតែ​រីក​ធំ​។​ ​ចំណែក​ប្រ​ធានសភាព​អាមេរិក​មកពី​គណបក្ស​ប្រជាធិបតេយ្យគឺ​លោកស្រី Nancy Pelosi បាន​និយាយ​កាលពី​ថ្ងៃ​ពុធ​ថា ប្រជាជន​រុស្ស៊ី រួម​ទាំង​ប្រធានាធិបតី​របស់​ប្រទេស​នេះ​គឺ​លោក Vladmir Putin មិន​ទាន់​បាន​មើល​ឃើញ​ពី​ជម្រៅ​នៃ​ទណ្ឌកម្ម​នៅឡើយ​ទេ ជុំវិញ​ការ​ឈ្លានពាន​របស់​រុស្ស៊ី​ចូល​អ៊ុយ​ក្រែ​ន​៕

អត្ថបទ៖ សុខមាន