ខណៈប្រតិបត្តិការសម្អាតចាប់ផ្តើមនៅលើកោះស៊ូម៉ាត្រាប្រទេសឥណ្ឌូនេស៊ី ការព្រួយបារម្ភកំពុងកើនឡើងលើការរាលដាលជំងឺ។ វាកើតឡើងបន្ទាប់ពីទឹកជំនន់និងបំណាក់ដីដែលបង្កឡើងដោយព្យុះស៊ីក្លូនដ៏មហន្តរាយ បានវាយប្រហារលើកោះក្នុងខែនេះ។ មនុស្សជាង៩៤០នាក់ ពេលនេះត្រូវបានបញ្ជាក់ថាស្លាប់ និងរាប់រយនាក់ទៀតកំពុងបាត់ខ្លួន។

ក្រសួងសុខាភិបាល បាននិយាយថា បច្ចុប្បន្ននេះ ប្រជាជនជាច្រើនកំពុងទទួលរងពីជំងឺរាគរូស គ្រុនក្តៅ និងឈឺសាច់ដុំ បន្ទាប់ពីគ្រោះមហន្តរាយ។ នៅមន្ទីរពេទ្យតែមួយគត់ភាគខាងជើងតំបន់អាឆេ តាមៀង (Aceh Tamiang) អ្នកជំងឺ និងបុគ្គលិកពេទ្យបានប្រាប់សារព័ត៌មានរ៉យទ័រអំពីស្ថានភាពជំងឺកាន់តែអាក្រក់ទៅៗនៅទីនោះ។ សាក្សី បានពិពណ៌នាអំពីឧបករណ៍វេជ្ជសាស្ត្រគ្របដណ្ដប់ដោយដីល្បប់ សឺរាំងនៅរាយប៉ាយលើកម្រាលឥដ្ឋ និងឱសថត្រូវបានទឹកជំនន់ហូរនាំ។ នាង Nurhayati គឺជាគិលានុបដ្ឋាយិកាម្នាក់ បាននិយាយថា មន្ទីរពេទ្យបានជាប់គាំង។ មនុស្សជាច្រើនស្គាល់ខ្ញុំជាគិលានុបដ្ឋាយិកា ហើយនៅពេលដែលខ្ញុំមិនអាចធ្វើអ្វីបាន វាមានអារម្មណ៍សោកសៅជាខ្លាំង។ ខ្ញុំអាចផ្តល់បានឱសថដែលមានតែប៉ុណ្ណោះ នេះគឺជាមហន្តរាយដ៏អស្ចារ្យ។ អ្វីៗទាំងអស់ត្រូវបានបំផ្លាញ។ នាងក៏បាននិយាយថា បុគ្គលិកបានព្យាយាម ប៉ុន្តែបរាជ័យ ក្នុងការជួយសង្គ្រោះម៉ាស៊ីនជំនួយផ្លូវដង្ហើមនៅក្នុងផ្នែកសង្គ្រោះបន្ទាន់សម្រាប់ទារកពីទឹកជំនន់ដែលកំពុងហក់ឡើង។ នាងបាននិយាយបន្ថែមថា យ៉ាងហោចណាស់ទារកម្នាក់ក្នុងចំណោមទារក៦នាក់នៅទីនោះ បានស្លាប់។

វាក៏បានប៉ះពាល់ដល់ការផ្តល់ជំនួយ និងទឹកស្អាតផងដែរ ដែលកំពុងចាប់ផ្តើមចូលមកជាបណ្តើរៗ ហើយនាង និងក្រុមគ្រួសារ ពុំមានទឹកស្អាតប្រើប្រាស់រយៈពេលជាងមួយសប្តាហ៍មកហើយ។