លទ្ធផលនៃការបោះឆ្នោតក្រុមប្រឹក្សានីតិបញ្ញត្តិអាណត្តិទី៨ (ឬហៅកាត់ថាក្រុមប្រឹក្សា LegCo) នៃតំបន់រដ្ឋបាលពិសេសហុងកុង របស់ប្រទេសចិន ត្រូវបានបើកបង្ហាញនៅព្រឹកថ្ងៃចន្ទ (៨ ធ្នូ) នេះ។

សមាជិកទាំង ៩០រូបនៃក្រុមប្រឹក្សា LegCo អាណត្តិថ្មីរបស់ទីក្រុងហុងកុង ត្រូវបានជ្រើសរើស ដោយរួមមាន ៤០រូប ត្រូវជ្រើសរើសដោយគណៈកម្មាធិការរៀបចំការបោះឆ្នោត និងចំនួន ៣០រូប ត្រូវជ្រើសរើសដោយមណ្ឌលបោះឆ្នោតតាមមុខងារ ចំណែក ២០រូបទៀត ជ្រើសតាំងដោយមណ្ឌលភូមិសាស្ត្រ តាមរយៈការបោះឆ្នោតដោយផ្ទាល់។

ក្រុមប្រឹក្សា LegCo អាណត្តិទី៨ របស់ទីក្រុងហុងកុង នឹងចាប់ផ្តើមអាណត្តិ ៤ឆ្នាំរបស់ខ្លួន នៅថ្ងៃទី១ ខែមករា ឆ្នាំ២០២៦ ខាងមុខនេះ។

ប្រហែល ១ភាគ៣ នៃអ្នកចុះឈ្មោះបោះឆ្នោតនៅទីក្រុងហុងកុង បានចេញទៅទម្លាក់សន្លឹកឆ្នោតរបស់ពួកគេ កាលពីថ្ងៃអាទិត្យចុងសប្ដាហ៍កន្លងទៅ ដើម្បីជ្រើសរើសក្រុមប្រឹក្សានីតិបញ្ញត្តិថ្មីនេះ។ អត្រាអ្នកទៅបោះឆ្នោតបានឈានដល់ ៣១,៩% ដែលជាកំណើនលើសពី ៣០,២% ក្នុងការបោះឆ្នោតកាលឆ្នាំ២០២១ ដែលជាព្រឹត្តិការណ៍លើកដំបូង ធ្វើឡើងក្រោមប្រព័ន្ធថ្មី។

អត្រាដ៏ប្រសើរនេះបានកើតឡើង ស្របពេលកំហឹងសាធារណៈចំពោះហេតុការណ៍អគ្គិភ័យដ៏ធំមួយនៅតំបន់លំនៅឋាន ដែលបានសម្លាប់មនុស្សជិត ១៦០នាក់ កាលពីចុងខែមុន៕