គុនល្បុក្កតោ៖ បន្ទាប់ពីធ្វើការផ្លាស់ប្ដូរកាលបរិច្ឆេទប្រកួតថ្មី ការប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិប្រចាំឆ្នាំ២០២១ នឹងចាប់ផ្ដើមយុទ្ធនាការចម្រាញ់រកជើងខ្លាំងប្រចាំឆ្នាំនាថ្ងៃទី២៥ ខែកុម្ភៈ ឆ្នាំ២០២២ ស្អែកនេះហើយនៅមជ្ឈមណ្ឌលជាតិហ្វឹកហ្វឺនកីឡាការ៉ាតេ នៃសាកលវិទ្យាល័យភូមិន្ទភ្នំពេញ។
ចំពោះយុទ្ធនាការចម្រាញ់រកកីឡាករ-កីឡាការិនីឆ្នើមប្រចាំឆ្នាំនេះ សហព័ន្ធគ្រោងរៀបចំការប្រកួតលើវិញ្ញាសាជាច្រើន ដូចជាវិញ្ញាសាប្រភេទទម្រង់សម្ដែង រួមមានទ្វារមេគុនដៃ, ទ្វារមេគុនអាវុធឥតមុខ, ទ្វារមេគុនអាវុធមានមុខ, ទ្វារមេគុនព្រលឹងល្បុក្កតោ, ទ្វារមេគុនដៃក្រុម, សមយុទ្ធបុរស ១ទល់១, សមយុទ្ធនារី ១ទល់១។ រីឯប្រភេទវិញ្ញាសាប្រយុទ្ធ រួមមានប្រយុទ្ធផ្នែកបុរសប្រភេទទម្ងន់ ៤៨-៥០គីឡូក្រាម, ៥២-៥៤គីឡូក្រាម, ៥៦-៥៨គីឡូក្រាម និង ៦៤-៦៦គីឡូក្រាម ខណៈផ្នែកនារី រួមមានប្រយុទ្ធប្រភេទទម្ងន់ក្រោម ៤៥គីឡូក្រាម, ៤៨-៥០គីឡូក្រាម, ៥៣-៥៥គីឡូក្រាម និងប្រភេទទម្ងន់ ៥៨-៦០គីឡូក្រាមជាដើម។ លោក អ៊ូ តារា អគ្គលេខាធិការរងសហព័ន្ធកីឡាគុនល្បុក្កតោកម្ពុជាបានប្រាប់ក្រុមការងារ BTV-News ក្នុងកម្មវិធីផ្ទះស៊ីហ្គេមឆ្នាំ២០២៣ ថា ជាព្រឹត្តិការណ៍ថ្នាក់ជាតិនេះគឺជាការប្រកួតដ៏សំខាន់ ដើម្បីវាស់ស្ទង់សមត្ថភាព និងពង្រឹងសមត្ថភាព-បច្ចេកទេសត្រៀមស៊ីហ្គេម។ ដូច្នេះលោកអំពាវនាវឲ្យកីឡាករ-កីឡាការិនីទាំងអស់ត្រូវខិតខំឲ្យអស់ពីសមត្ថភាពក្នុងការប្រកួតរៀងៗខ្លួន។
សូមបញ្ជាក់ថា នេះគឺជាព្រឹត្តិការណ៍ប្រចាំឆ្នាំដែលសហព័ន្ធតែងរៀបចំ ដើម្បីផ្ដល់ឱកាសឲ្យកីឡាករ-កីឡាការិនីតាមបណ្ដាក្លិប និងគ្រប់រាជធានី-ខេត្តបានចូលរួមប្រកួត និងបង្ហាញសមត្ថភាព បន្ទាប់ពីធ្វើការហ្វឹកហាត់កន្លងមក ដើម្បីសម្រិតសម្រាំងរកកីឡាករ-កីឡាការិនីមានសមត្ថភាព និងគុណផលខ្ពស់ឆ្ពោះទៅរកការចូលរួមជាមួយក្រុមជម្រើសជាតិ និងត្រៀមចូលរួមការប្រកួតថ្នាក់ជាតិ-អន្ដរជាតិ ពិសេសដំណើរឆ្ពោះទៅស៊ីហ្គេមឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
