អ្នកស៊ើបអង្កេតអង្គការសហប្រជាជាតិ បាននិយាយកាលពីថ្ងៃអាទិត្យថា ដំណើរការផ្លាស់ប្តូរស៊ីរី គឺផុយស្រួយ រយៈពេលមួយឆ្នាំបន្ទាប់ពីមេដឹកនាំលោក បាសា អាល់អាសាដ ត្រូវបានផ្តួលរលំ ហើយវដ្តនៃការសងសឹក និងការធ្វើបាបនៅក្នុងប្រទេសនេះ ចាំបាច់ត្រូវបញ្ចប់។

ប្រជាជនស៊ីរីបានប្រារព្ធខួបលើកទី១ ចាប់តាំងពីកងកម្លាំងដឹកនាំដោយឥស្លាមនិយម បានវាយប្រហារលុកផ្លេកបន្ទោរ ដើម្បីផ្តួលរំលំលោក អាសាដ នៅថ្ងៃទី ០៨ ខែធ្នូ ឆ្នាំ ២០២២ បន្ទាប់ពីសង្គ្រាមជិត ១៤ ឆ្នាំ។

គណៈកម្មការស៊ើបអង្កេតអន្តរជាតិឯករាជ្យរបស់អង្គការសហប្រជាជាតិលើប្រទេសស៊ីរី បានស៊ើបអង្កេត និងកត់ត្រាការរំលោភច្បាប់សិទ្ធិមនុស្សអន្តរជាតិទាំងអស់ ចាប់តាំងពីខែមីនា ឆ្នាំ ២០១១ នៅក្នុងប្រទេសនេះ។

គណៈកម្មការនេះ បានសរសើរប្រទេសស៊ីរីចំពោះជំហានដែលខ្លួនបានអនុវត្តរហូតមកដល់ពេលនេះ ដើម្បីដោះស្រាយឧក្រិដ្ឋកម្ម និងការរំលោភបំពាន ដែលបានប្រព្រឹត្តក្នុងអំឡុងទសវត្សរ៍មុនៗ។

ប៉ុន្តែគណៈកម្មការបាននិយាយថា ព្រឹត្តិការណ៍ដ៏ហិង្សា ចាប់តាំងពីការដួលរលំនៃរបបលោក អាសាដ បានបណ្តាលឲ្យមានការផ្លាស់ទីលំនៅ និងការបែកបាក់ ដែល «បង្កើនការព្រួយបារម្ភអំពីទិសដៅអនាគតរបស់ប្រទេសនេះ»។ 

គណៈកម្មការ បានបញ្ជាក់ថា៖«កំណត់ត្រាគួរឲ្យភ័យខ្លាច»នៃការរំលោភបំពានដែលបង្កឡើងដោយរបបរបស់លោក អាសាដ «គឺស្មើនឹងអំពើហិង្សាព្រហ្មទណ្ឌ» ប្រឆាំងនឹងប្រជាជនស៊ីរី៕