រដ្ឋមន្ត្រីការបរទេសអ៊ីរ៉ាក់ លោក Fuad Hussein បានប្រាប់លោក Tom Barrack បេសកជនពិសេសសហរដ្ឋអាមេរិកទទួលបន្ទុកស៊ីរី កាលពីថ្ងៃអាទិត្យថា រដ្ឋាភិបាលអ៊ីរ៉ាក់មានការភ្ញាក់ផ្អើលចំពោះសេចក្តីថ្លែងការណ៍ថ្មីៗរបស់លោក Barrack ទាក់ទងនឹងស្ថានភាពផ្ទៃក្នុងរបស់ប្រទេសនេះ។ នេះបើយោងតាមសេចក្តីថ្លែងការណ៍របស់ក្រសួងការបរទេសអ៊ីរ៉ាក់។

នៅក្នុងបទសម្ភាសន៍ថ្មីៗនេះអំពីគោលនយោបាយមជ្ឈិមបូព៌ារបស់សហរដ្ឋអាមេរិក លោក Barrack បាននិយាយថា វិមជ្ឈការមិនដែលដំណើរការនៅកន្លែងណាមួយ នៅក្នុងតំបន់នេះទេ ដោយលើកឡើងពីប្រទេសអ៊ីរ៉ាក់ ជាឧទាហរណ៍។

លោកក៏បានអះអាងផងដែរថា ខណៈពេលដែលលោកនាយករដ្ឋមន្ត្រីអ៊ីរ៉ាក់ បានជាប់ឆ្នោត លោកមាន «អំណាចសូន្យ» ដោយសារនាយករដ្ឋមន្ត្រីរូបនេះ «មិនអាចបង្កើតសម្ព័ន្ធភាពសភាបាន»។

ក្នុងអំឡុងពេលនៃកិច្ចប្រជុំរបស់ពួកគេ ដែលត្រូវបានធ្វើឡើងនៅខាងក្រៅវេទិកា Doha លើកទី ២៣ នៅប្រទេសកាតា លោក Hussein បានសង្កត់ធ្ងន់ថា ជម្រើសរបស់ប្រជាជនអ៊ីរ៉ាក់ ត្រូវបានគោរព ហើយលទ្ធិប្រជាធិបតេយ្យ និងប្រព័ន្ធសហព័ន្ធ ត្រូវបានចែងនៅក្នុងរដ្ឋធម្មនុញ្ញ ហើយបានក្លាយជាផ្លូវដែលបានបង្កើតឡើងយ៉ាងរ៉ឹងមាំដោយគ្មានជម្រើសផ្សេងទៀត ទោះបីជាមានបញ្ហាប្រឈមក៏ដោយ។ នេះបើយោងតាមសេចក្តីថ្លែងការណ៍។

សេចក្តីថ្លែងការណ៍បានឲ្យដឹងថា លោក Barrack បាននិយាយថា «រដ្ឋបាលសហរដ្ឋអាមេរិកចាត់ទុកបទពិសោធរបស់អ៊ីរ៉ាក់ដោយការគោរព» ហើយថាលើកឡើងរបស់លោក «ទាក់ទងនឹងបទពិសោធរបស់អាមេរិកនៅក្នុងប្រទេសអ៊ីរ៉ាក់»

មន្ត្រីទាំងពីររូប ក៏បានពិភាក្សាអំពីទំនាក់ទំនងទ្វេភាគី និងកិច្ចការស៊ីរីផងដែរ។ នេះបើយោងតាមសេចក្តីថ្លែងការណ៍៕