នគរបាលបាននិយាយថា ការបាញ់ប្រហារសម្លាប់រង្គាលទ្រង់ទ្រាយធំមួយ បានកើតឡើងកាលពីថ្ងៃសៅរ៍ (៦ ធ្នូ) ធ្វើឡើងដោយជនសង្ស័យជាច្រើននាក់ នៅក្នុងភោជនីយដ្ឋានពេលរាត្រី (បារ) ដែលគ្មានអាជ្ញាបណ្ណ នៅជិតរដ្ឋធានីអាហ្រ្វិកខាងត្បូង ដែលបណ្តាលឱ្យមនុស្សយ៉ាងតិច ១២នាក់ បានស្លាប់ ក្នុងនោះ មានជនរងគ្រោះជាកុមារ ៣នាក់ -- អាយុ៣ឆ្នាំ ១២ឆ្នាំ និង១៦ឆ្នាំ។

នគរបាលបន្តថា មនុស្ស ១៣នាក់ ផ្សេងទៀតរងរបួស ហើយកំពុងសម្រាកព្យាបាលនៅមន្ទីរពេទ្យ។ អាជ្ញាធរបញ្ជាក់ថា តួលេខអ្នកស្លាប់ថ្មីនេះគឺជាការកែសម្រួលពីចំនួន ១១នាក់ពីមុន ដោយជនរងគ្រោះទី១២ បានស្លាប់នៅមន្ទីរពេទ្យ។ ការបាញ់ប្រហារនេះកើតឡើងនៅបារខាងក្នុងផ្ទះសំណាក់មួយកន្លែង នៅសង្កាត់ Salsville ភាគខាងលិចនៃតំបន់រដ្ឋបាល ប្រេតូរីយ៉ា នៅព្រឹកព្រលឹមថ្ងៃសៅរ៍។

អ្នកនាំពាក្យនគរបាលអាហ្រ្វិកខាងត្បូង និយាយថា៖ អាជ្ញាធរទទួលដំណឹងថា ខ្មាន់កាំភ្លើងមិនស្គាល់អត្តសញ្ញាណ ៣នាក់ ចូលទៅផ្ទះសំណាក់នោះ ក្នុងពេលដែលមនុស្សមួយក្រុមកំពុងជួបជុំផឹកស្រា ហើយជនដៃដល់ក៏បើកការបាញ់ប្រហារមិនរើសគោលដៅ ខណៈមូលហេតុមិនទាន់ច្បាស់នៅឡើយ។

អាហ្រ្វិកខាងត្បូង មានអត្រាឃាតកម្មខ្ពស់បំផុតមួយនៅក្នុងពិភពលោក ហើយបានកត់ត្រាការសម្លាប់មនុស្សច្រើនជាង ២៦.០០០នាក់ ក្នុងឆ្នាំ២០២៤ ដែលគិតជាមធ្យម មានការស្លាប់ច្រើនជាង ៧០នាក់ នៅក្នុងមួយថ្ងៃ នេះបើយោងតាមទិន្នន័យ៕