ប្រធានាធិបតីអ៊ុយក្រែន លោក Volodymyr Zelenskyy នឹងជួបជាមួយមេដឹកនាំសំខាន់ៗរបស់អឺរ៉ុប នៅទីក្រុងឡុងដ្រ៍ របស់ចក្រភពអង់គ្លេស នៅថ្ងៃចន្ទ (៨ ធ្នូ) នេះ ខណៈដែលសម្ព័ន្ធមិត្តរបស់អ៊ុយក្រែន រៀបចំគម្រោងឆ្លើយតបរបស់ពួកគេ ចំពោះការជំរុញរបស់សហរដ្ឋអាមេរិក ឱ្យទីក្រុងគីវ ទួលយកសម្បទានក្នុងការចរចាសន្តិភាព។

ថ្នាក់ដឹកនាំបារាំង និងអាល្លឺម៉ង់ ក៏នឹងចូលរួមជាមួយលោក Zelenskyy និងនាយករដ្ឋមន្ត្រីអង់គ្លេស លោក Keir Starmer នៅវិមាននាយករដ្ឋមន្រ្តីទីក្រុងឡុងដ្រ៍ ស្របពេលសម្ព័ន្ធមិត្តទីក្រុងគីវ ស្វះស្វែងរកការធានាថា កិច្ចព្រមព្រៀងណាមួយត្រូវតែរារាំងការវាយប្រហារនាពេលអនាគតរបស់រុស្ស៊ី។

កិច្ចប្រជុំកម្រិតខ្ពស់នេះធ្វើឡើងបន្ទាប់ពីកិច្ចចរចារយៈពេល ៣ថ្ងៃនៅរដ្ឋ Florida រវាងអាមេរិក-អ៊ុយក្រែន ជាទីដែលអ្នកចរចាសំខាន់របស់លោក Zelenskyy បានជំរុញឱ្យមានការផ្លាស់ប្តូរក្នុងផែនការសេតវិមាន ដែលត្រូវចាត់ទុកថាយ៉ាងទូលំទូលាយថា សម្របតាមការទាមទារសំខាន់ៗរបស់វិមានក្រឹមឡាំង។

ទាំងសហរដ្ឋអាមេរិក និងអ៊ុយក្រែន បានលើកពីវឌ្ឍនភាពយ៉ាងល្អ ប៉ុន្តែប្រធានាធិបតីអាមេរិក លោក Donald Trump ហាក់ដូចជារិះគន់លោក Zelenskyy នៅថ្ងៃអាទិត្យ ដោយនិយាយថា មេដឹកនាំអ៊ុយក្រែនរូបនេះ "មិនទាន់បានអាន" សេចក្តីព្រាងនៃសំណើសន្តិភាពនោះទេ។

វិមាននាយករដ្ឋមន្ត្រីអង់គ្លេស Downing Street បាននិយាយថា កិច្ចប្រជុំកម្រិតខ្ពស់នេះនឹង "ផ្តោតលើការចរចាសន្តិភាពដែលកំពុងបន្ត និងជំហានបន្ទាប់" ខណៈរដ្ឋមន្ត្រីមកពីគណៈរដ្ឋមន្ត្រីអង់គ្លេស បាននិយាយថា ជំនួបនេះនឹងស្វែងរកវិធីដើម្បីធានាថា អ៊ុយក្រែន "អាចសម្រេចចិត្តលើអនាគតរបស់ខ្លួន"៕