សារព័ត៌មាន Politico បានរាយការណ៍ថា កូនប្រុសច្បងរបស់ប្រធានាធិបតីអាមេរិក Donald Trump គឺលោក Donald Trump Jr. បានរិះគន់អំពើពុករលួយនៅអ៊ុយក្រែន ហើយបានបង្ហើបកាលពីថ្ងៃអាទិត្យ (៧ ធ្នូ) ថា មេដឹកនាំអាមេរិករូបនេះ អាចដើរចេញពីបញ្ហាអ៊ុយក្រែន ប្រសិនបើទីក្រុងគីវ មិនចុះកិច្ចព្រមព្រៀងសន្តិភាពជាមួយរុស្ស៊ីទេនោះ។

ថ្លែងនៅវេទិកាដូហា ដែលជាការប្រមូលផ្តុំដ៏ធំរបស់មន្ត្រីរដ្ឋាភិបាលនិងបុគ្គលអន្តរជាតិសំខាន់ៗផ្សេងទៀត លោក Trump Jr. បានសង្កត់ធ្ងន់ថា អ៊ុយក្រែនត្រូវបានរំខានជាយូរមកហើយដោយអំពើពុករលួយ នៅក្នុងជួរមន្រ្តីរបស់ខ្លួន ហើយបានអះអាងថា អំពើពុករលួយបែបនេះកំពុងបញ្ឆេះសង្រ្គាមទាំងនៅទីក្រុងមូស្គូ និងទីក្រុងគីវ។

នៅពេលសួរថាតើលោកប្រធានាធិបតី Donald Trump អាចដើរចេញពីអ៊ុយក្រែនឬទេ កូនប្រុសមេដឹកនាំអាមេរិករូបនេះបាននិយាយថា "ប្រហែលជាអាច"។ លោកបន្ថែមថា៖ ឪពុករបស់លោកជាបុគ្គលដែលមិនអាចទាយទុកជាមុនបានទេ ហើយពុំមានអ្នកណាដឹងឡើយថាលោកនឹងធ្វើអ្វីបន្ទាប់ បែបនេះហើយដែលបង្ខំឱ្យអ្នកគ្រប់គ្នាដោះស្រាយបញ្ហាដោយភាពស្មោះត្រង់ខាងបញ្ញាស្មារតី។

លោកប្រធានាធិបតី Trump មានទំនាក់ទំនងដ៏លំបាកជាយូរមកហើយជាមួយអ៊ុយក្រែន ព្រមទាំងជាមួយមេដឹកនាំអ៊ុយក្រែន លោក Volodymyr Zelenskyy ផ្ទាល់ ហើយជាញឹកញាប់ លោកបានបង្ហាញការអាណិតអាសូរចំពោះរុស្ស៊ី និងមេដឹកនាំរុស្ស៊ី លោក Vladimir Putin ជំនួសវិញ។ រដ្ឋបាលលោក Trump បាននិងកំពុងជំរុញប្រទេសទាំងពីរឱ្យចុះហត្ថលេខាលើកិច្ចព្រមព្រៀងសន្តិភាព ប៉ុន្តែមិនទាន់មានផ្លែផ្កាធំដុំនៅឡើយទេ៕