អនុរដ្ឋមន្ត្រីការបរទេស លោក Sergey Ryabkov បានប្រាប់សារព័ត៌មាន TASSថា រុស្ស៊ី«ឈរកៀកស្មា» ជាមួយថ្នាក់ដឹកនាំវ៉េណេស៊ុយអេឡា ហើយអំពាវនាវឲ្យរដ្ឋបាលរបស់ប្រធានាធិបតីអាមេរិក ដូណាល់ ត្រាំ ជៀសវាងការធ្វើឲ្យស្ថានការណ៍កាន់តែធ្ងន់ធ្ងរជាមួយទីក្រុងការ៉ាកាសទៅជាជម្លោះពេញបន្ទុក។  

អ្នកការទូតជាន់ខ្ពស់រូបនេះ បានកត់សម្គាល់ថា ទីក្រុងមូស្គូមើលឃើញស្ថានភាពជុំវិញប្រទេសវ៉េណេស៊ុយអេឡាដោយក្តីបារម្ភ និងការព្រួយបារម្ភយ៉ាងខ្លាំង ដោយសារ «ភាពតានតឹងមិនថយចុះ» ហើយ «ការកើនឡើងនៅតែបន្ត»។ លោក Ryabkov បានពន្យល់ថា៖«ការកើនឡើងភាពតានតឹងនេះ គឺភាគច្រើនដោយសារតែបំណងប្រាថ្នាចង់បង្កើតការត្រួតត្រាយ៉ាងពិតប្រាកដរបស់សហរដ្ឋអាមេរិក នៅក្នុងតំបន់ ដែលជា «វិធីសាស្ត្រពិសេស»របស់រដ្ឋបាលលោក ត្រាំ»។

លោក Ryabkov បានសង្កត់ធ្ងន់ថា៖«យើងបង្ហាញពីសាមគ្គីភាពរបស់យើងជាមួយប្រទេសវ៉េណេស៊ុយអេឡា ដែលយើងបានចុះហត្ថលេខាលើកិច្ចព្រមព្រៀងភាពជាដៃគូ និងកិច្ចសហប្រតិបត្តិការជាយុទ្ធសាស្ត្រថ្មីៗនេះ»។ លោក Ryabkov បានសង្កត់ធ្ងន់ថា៖«យើងគាំទ្រវ៉េណេស៊ុយអេឡា ខណៈដែលប្រទេសនេះគាំទ្រយើង នៅក្នុងវិស័យជាច្រើន។ នៅក្នុងកាលៈទេសៈដ៏លំបាកនេះ យើងឈរកៀកស្មាជាមួយទីក្រុងការ៉ាកាស និងថ្នាក់ដឹកនាំវ៉េណេស៊ុយអេឡា។ យើងសង្ឃឹមថា រដ្ឋបាលលោក ត្រាំ នឹងចៀសវាងការធ្វើឲ្យស្ថានការណ៍កាន់តែធ្ងន់ធ្ងរឡើង ក្លាយទៅជម្លោះទ្រង់ទ្រាយធំ។ យើងជំរុញឲ្យរដ្ឋបាលនេះធ្វើដូច្នេះ»៕