ក្រសួងការបរទេសចិន និយាយនៅថ្ងៃចន្ទនេះថា ចិនត្រៀមខ្លួនរួចរាល់ ដើម្បីធ្វើការជាមួយសហរដ្ឋអាមេរិក ធ្វើឲ្យចំណងមិត្តភាពល្អប្រសើរឡើង ខណៈការពារយ៉ាងរឹងមាំ អធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ខ្លួន ។

អ្នកនាំពាក្យក្រសួងការបរទេសចិនលោក Guo Jiakun បានធ្វើសេចក្តីអត្ថាធិប្បាយបែបនេះ ជាការឆ្លើយតបនឹងសំណួរពីយុទ្ធសាស្រ្តសន្តិសុខថ្មីរបស់ទីក្រុងវ៉ាស៊ីនតោន អំឡុងសន្និសីទសារព័ត៌មាន ។

លោក Guo និយាយថា ចិនសង្ឃឹមថា ភាគីសហរដ្ឋអាមេរិកនឹងផ្លាស់ទីក្នុងទិសដៅតែមួយ ពង្រឹងកិច្ចសន្ទនា និងកិច្ចសហប្រតិបត្តិការ គ្រប់គ្រងឲ្យបានត្រឹមត្រូវការខ្វែងគំនិតគ្នា និងលើកកម្ពស់ទំនាក់ទំនងប្រកបដោយស្ថិរភាព ។

 គួរឲ្យដឹងថា ឯកសារយុទ្ធសាស្រ្តសន្តិសុខជាតិផ្លូវការចេញកាលពីថ្ងៃសុក្រសប្តាហ៍មុន លើកឡើងថា ប្រធានាធិបតីសហរដ្ឋអាមេរិកលោក Donald Trump មានបំណងការពារជម្លោះជាមួយចិន ជុំវិញបញ្ហាកោះតៃវ៉ាន់ និងសមុទ្រចិនខាងត្បូង តាមរយៈការបង្កើតកម្លាំងយោធារបស់សម្ព័ន្ធមិត្តសហរដ្ឋអាមេរិក ។

វាបានកើតមានឡើង ស្របពេលទីក្រុងប៉េកាំងបង្កើនសម្ពាធលើកោះតៃវ៉ាន់ និងជប៉ុន ជាមួយនឹងការដាក់ពង្រាយនាវានៅទូទាំងដែនទឹកនៅតំបន់អាស៊ីបូព៌ា កាលពីសប្តាហ៍កន្លងទៅ នៅក្នុងការបង្ហាញកងកម្លាំងសមុទ្រធំបំផុតរបស់ពួកគេ មកទល់នឹងពេលនេះ ៕