ប្រធានក្រុមប្រឹក្សាអឺរ៉ុប លោក Antonio Costa នៅថ្ងៃចន្ទ (ទី៨ ខែធ្នូ) បានច្រានចោលការប៉ុនប៉ងណាមួយរបស់សហរដ្ឋអាមេរិក ក្នុងការជ្រៀតជ្រែកក្នុងនយោបាយរបស់អឺរ៉ុប បន្ទាប់ពីទីក្រុងវ៉ាស៊ីនតោន បានចេញផ្សាយយុទ្ធសាស្រ្តសន្តិសុខថ្មី ដែលបានរិះគន់យ៉ាងខ្លាំងទៅលើគោលនយោបាយរបស់ទ្វីបនេះ។

លោក Costa បានប្រាប់សន្និសីទនៅទីក្រុងព្រុចប៊្រុចសែលថា៖ «អ្វីដែលយើងមិនអាចទទួលយកបាននោះ គឺការគំរាមកំហែងជ្រៀតជ្រែក ក្នុងនយោបាយអឺរ៉ុប»។

គួរបញ្ជាក់ថា យុទ្ធសាស្ត្រសន្តិសុខជាតិថ្មីរបស់សហរដ្ឋអាមេរិក ដែលត្រូវបានចេញផ្សាយកាលពីសប្តាហ៍មុន បានឃើញថា លោកប្រធានាធិបតី Donald Trump បានរិះគន់ទ្វីបអឺរ៉ុបថា ជាទ្វីបដែលមានច្បាប់គ្រប់គ្រងជ្រុលពេក និងខ្វះ «ទំនុកចិត្តលើខ្លួនឯង» ហើយប្រឈមនឹង «ការបាត់បង់វប្បធម៌» ដោយសារជនអន្តោប្រវេសន៍។

យុទ្ធសាស្ត្រនេះបានបញ្ជាក់យ៉ាងច្បាស់ថា សហរដ្ឋអាមេរិកក្រោមការដឹកនាំរបស់លោក Trump នឹងបន្តយ៉ាងខ្លាំងក្លានូវគោលដៅស្រដៀងគ្នា នៅក្នុងទ្វីបអឺរ៉ុប ដែលស្របតាមរបៀបវារៈរបស់ក្រុមស្តាំនិយមជ្រុល។

យ៉ាងណាក្ដី លោក Costa បាននិយាយថា៖ «សហរដ្ឋអាមេរិកមិនអាចជំនួសពលរដ្ឋអឺរ៉ុប ក្នុងការជ្រើសរើសគណបក្សណាល្អ និងណាអាក្រក់បានឡើយ។ សហរដ្ឋអាមេរិកមិនអាចជំនួសអឺរ៉ុប ដែលចក្ខុវិស័យរបស់ប្លុក គឺសេរីភាពនៃការបញ្ចេញមតិ»៕