មនុស្សស្រី-ប្រុសរាប់រយនាក់ អង្គុយជាជួរនៅក្នុងបន្ទប់ថ្នាក់រៀនធ្វើពីឈើមួយកន្លែង ស្តាប់មេដឹកនាំក្រុមចលនាបោះបោរ M23 របស់កុងហ្គោ នៅពេលបញ្ចប់កម្មវិធីសិក្សាឡើងវិញរយៈពេល ២សប្តាហ៍ ។

រូបភាពវីដេអូឃ្លីបនៅកម្មវិធីបញ្ចប់ការសិក្សានេះ ឃើញមេដឹកនាំឧទ្ទាមលោក Sultani Makenga សួរទៅកាន់សិស្សថា តើអ្នកយល់ថា មានតែកងកម្លាំងមួយគត់ដែលអាចរំដោះប្រទេសរបស់ពួកគេចេញពីការគ្រប់គ្រងខុសដោយរដ្ឋាភិបាលក្រុង Kinshasa ឬ? សិស្សបានឆ្លើយមកវិញថា មែនហើយលោកមេបញ្ជាការ ។

ប៉ុន្តែពួកគេពុំស្លៀកពាក់ឯកសណ្ឋានយោធានោះទេ ។ ក្រុមប្រតិបត្តិឧទ្ទាមថ្មីទាំងនេះ មាននៅតំបន់ជួរមុខស៊ីវិល នៅក្នុងយុទ្ធនាការរបស់ក្រុមឧទ្ទាម M23 ដើម្បីពង្រឹងរដ្ឋបាលនៅទូទាំងតំបន់ភាគខាងកើតសាធារណរដ្ឋប្រជាធិបតេយ្យកុងហ្គោ ដែលពួកគេរឹបអូសបាននៅក្នុងការរុលទៅមុខលឿនដូចផ្លេកបន្ទោររបស់ពួកគេកាលពីខែមករា ។

កម្មវិធីសិក្សាឡើងវិញខាងលើ បានធ្វើឡើងកាលពីខែកញ្ញា នៅជិតទីក្រុង Rutshuru ស្ថិតក្នុងខេត្ត North Kivu របស់កុងហ្គោ ។ នៅទីនោះ ជនស៊ីលវិលដែលចូលរួម នាំគ្នារៀនពីវិធីកាន់អាវុធ និងធ្វើលំហាត់យោធាខ្លះៗ ។ 

គួរឲ្យដឹងថា នៅថ្ងៃសុក្រសប្តាហ៍មុន ការប្រយុទ្ធគ្នាបានផ្ទុះឡើនៅភាគខាងកើតសាធារណរដ្ឋប្រជាធិបតេយ្យកុងហ្គោ រយៈពេល ១ថ្ងៃប៉ុណ្ណោះ ក្រោយប្រធានាធិបតីសហរដ្ឋអាមេរិកលោក Donald Trump ទទួលធ្វើជាម្ចាស់ផ្ទះក្រុមមេដឹកនាំកុងហ្គោ និងរ៉្វាន់ដា នៅទីក្រុងវ៉ាស៊ីនតោន ដើម្បីចុះហត្ថលេខាលើកិច្ចព្រមព្រៀងថ្មី មានគោលដៅបញ្ចប់ជម្លោះរយៈពេលជាច្រើនឆ្នាំនៅតំបន់សម្បូររ៉ែ ។

ប្រធានាធិបតីកុងហ្គោលោក Felix Tshisekedi និងប្រធានាធិបតីរ៉្វាន់ដាលោក Paul Kagame បានបញ្ជាក់ឡើងវិញពីការប្តេជ្ញាចិត្តរបស់ពួកគេចំពោះកិច្ចព្រមព្រៀងគំាទ្រដោយអាមេរិក ដែលបានឈានដល់កាលពីខែមិថុនា ដើម្បីធ្វើឲ្យមានស្ថិរភាពនៅកុងហ្គោ និងបើកផ្លូវសម្រាប់ការវិនិយោគរ៉ែបន្ថែមទៀតរបស់លោកខាងលិច ។

ក្រុមឧទ្ទាម M23គាំទ្រដោយរ៉្វាន់ដាដែលរឹបអូសបានទីក្រុងធំៗបំផុតចំនួន ២ នៅភាគខាងកើតកុងហ្គោកាលពីដើមឆ្នាំនេះ ហើយមិនអនុវត្តតាមកិច្ចព្រមព្រៀងរបស់ទីក្រុងវ៉ាស៊ីនតោន និយាយថា កងកម្លាំងភក្តីភាពជាមួយរដ្ឋាភិបាល បានបើកការវាយប្រហារទ្រង់ទ្រាយធំលើពួកគេ ៕