ក្រុមគ្រូពេទ្យស៊ូដង់ ដែលជាក្រុមបណ្តាញគ្រូពេទ្យលេចធ្លោមួយរបស់ប្រទេសមួយនេះ បានចោទប្រកាន់កងកម្លាំងគាំទ្ររហ័ស(RSF)ថាបានចាប់រំលោភសេពសន្ថវៈលើស្រ្តី ១៩នាក់ ពេលដែលពួកគេរត់ភៀសខ្លួនចេញពីទីក្រុង el-Fasher ស្ថិតនៅតំបន់ Darfur ។

ក្រុមបណ្តាញគ្រូពេទ្យស៊ូដង់និយាយនៅក្នុងសេចក្តីថ្លែងការណ៍កាលពីថ្ងៃអាទិត្យថា ពួកគេបានចងក្រងឯកសារករណីចាប់រំលោភលើស្រ្តីដែលបានរត់ភៀសខ្លួនចេញពីទីក្រុង al-Dabba ស្ថិតនៅរដ្ឋជិតខាងភាគខាងជើង ។

ក្រុមមួយនេះ បានសរសេរនៅលើបណ្តាញព័ត៌មានសង្គម Xថា ពួកគេសូមធ្វើការថ្កោលទោសយ៉ាងដាច់អហង្ការចំពោះករណីចាប់រំលោភបូកដែលត្រូវបានប្រព្រឹត្តឡើងដោយកងកម្លាំង RSF លើស្រ្តីរត់គេចចេញពីភាពឃោឃៅដ៏គួរឲ្យរន្ធត់នៅទីក្រុង El-Fasher ដែលការបន្តមានគោលដៅលើស្រ្តីបែបនេះ បានបំពានយ៉ាងធ្ងន់ធ្ងរលើច្បាប់អន្តរជាតិ តាមរយៈការប្រើប្រាស់រាងកាយស្រ្តីជាអាវុធគាបសង្កត់ ។ 

ប្រទេសស៊ូដង់ បានជាប់ផុងក្នុងសង្រ្គាមស៊ីវិល ចាប់តាំងពីខែមេសា ឆ្នាំ ២០២៣រហូតមក ពេលដែលការប្រយុទ្ធគ្នា បានផ្ទុះឡើងរវាងកងទ័ពស៊ូដង់ និងទាហានប៉ារ៉ា RSF ។

យោងតាមការអះអាងរបស់អង្គការសហប្រជាជាតិ បានឲ្យដឹងថា ជម្លោះមួយនេះ បានសម្លាប់មនុស្សរាប់ម៉ឺននាក់ និងមនុស្សជាង ១២លាននាក់ផ្សេងទៀត រត់ភៀសខ្លួន ហើយនិងធ្វើឲ្យមនុស្សប្រហែល ៣០លាននាក់ ត្រូវការជំនួយមនុស្សធម៌ ។

កងកម្លាំង RSF ដណ្តើមកាន់កាប់ទីក្រុង el-Fasher ដែលជារដ្ឋធានីនៃរដ្ឋ North Darfur កាលពីខែតុលាកន្លងទៅ ក្រោយយុទ្ធនាការឡោមព័ទ្ធ និងការបង្អត់អាហាររយៈពេល ១៨ខែ ។ ទីក្រុងមួយនេះ គឺជាតំបន់កាន់កាប់ចុងក្រោយគេរបស់កងទ័ពស៊ូដង់នៅតំបន់នោះ ។

អ្នករស់រានដែលបានរត់គេចចេញពីទីក្រុងមួយនេះ បានរំឭកដល់ការកាប់សម្លាប់ទ្រង់ទ្រាយធំ ការចាប់រំលោភ និងអំពើឃោឃៅផ្សេងទៀត បង្ខំឲ្យមានការថ្កោលទោសពីអន្តរជាតិ ។

ក្រុមលើកលែងទោសអន្តរជាតិ បានចោទប្រកាន់កងកម្លាំង RSF ពីបទឧក្រិដ្ឋកម្មសង្រ្គាម ខណៈក្រុមប្រឹក្សាសិទ្ធិមនុស្ស UN បានបញ្ជាឲ្យស៊ើបអង្កេតលើការបំពាននៅទីក្រុង el-Fasher ៕