លោកប្រធានាធិបតីអ៊ុយក្រែន Volodymyr Zelenskyy បានបញ្ជាក់ជាថ្មីថា អ៊ុយក្រែនមិនមានឆន្ទៈ ប្រគល់ទឹកដីទៅឱ្យរុស្ស៊ីទេ ខណៈការចរចាលើផែនការសន្តិភាពដែលស្នើឡើងដោយសហរដ្ឋអាមេរិកនៅតែបន្តដោយគ្មានភាពច្បាស់លាស់។  

លោក Zelenskyy បាននិយាយថា ពួកលោកពិតជាមិនចង់បោះបង់ចោលអ្វីទាំងអស់។ នោះហើយជាអ្វីដែលពួកលោកកំពុងតស៊ូ។ ពួកលោកមិនមានសិទ្ធិស្របច្បាប់ក្នុងការធ្វើដូច្នេះក្រោមច្បាប់អ៊ុយក្រែន រដ្ឋធម្មនុញ្ញ ច្បាប់អន្តរជាតិ ឬភាពស្មោះត្រង់និង ច្បាប់សីលធម៌របស់ពួកលោកទេ។

រុស្ស៊ីបានទទូចឱ្យសម្បទានទឹកដីជាផ្នែកមួយនៃការដោះស្រាយដើម្បីបញ្ចប់ការឈ្លានពានរបស់ខ្លួនលើអ៊ុយក្រែន។ ផែនការដំបូងដែលស្នើឡើងដោយប្រធានាធិបតីអាមេរិក លោក Donald Trump បានគូសបញ្ជាក់ពីសម្បទានមួយចំនួនទាំងនេះ។កាលពីថ្ងៃចន្ទ លោក Trump បានចោទប្រកាន់លោក Zelenskyy ថាមិនបានអានកំណែចុងក្រោយបំផុតនៃសំណើនេះ។

មុនទៅដល់ទីក្រុងព្រុចសែលសម្រាប់កិច្ចប្រជុំជាមួយមន្ត្រីនៃអង្គការណាតូ និងសហភាពអឺរ៉ុប បន្ទាប់ពីបានជួបជាមួយមេដឹកនាំនៃចក្រភពអង់គ្លេស បារាំង និងអាល្លឺម៉ង់នៅទីក្រុងឡុងដ៍្រ លោក Zelenskyy បាននិយាយថា ការចរចាមានភាពរីកចម្រើន។ លោកបាននិយាយថា សំណើសន្តិភាពកំពុងត្រូវបានបញ្ចប់ ហើយនឹងត្រូវបញ្ជូនទៅសហរដ្ឋអាមេរិកនៅថ្ងៃអង្គារនេះ។

លោក Zelenskyy បានបន្ថែមថា មានវឌ្ឍនភាពបន្តិចបន្តួចឆ្ពោះទៅរកការបញ្ចប់សង្គ្រាមដែលអាចកើតមាន ។ លោកគិតថាផែនការនេះនឹងរួចរាល់នៅថ្ងៃស្អែក។ នៅពេលល្ងាច ពួកលោក នឹងពិភាក្សា ម្តងទៀត ហើយបញ្ជូនទៅសហរដ្ឋអាមេរិកតែម្ដង៕