ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃចន្ទ (៨ ធ្នូ) ថា អ៊ុយក្រែន ខ្វះខាតថវិកាប្រមាណ ៨០០លានដុល្លារ ដើម្បីទិញសព្វាវុធរបស់សហរដ្ឋអាមេរិក ដែលខ្លួនគ្រោងនឹងទិញនៅឆ្នាំ២០២៥នេះ ដោយមានជំនួយពីសម្ព័ន្ធមិត្តអឺរ៉ុបរបស់ទីក្រុងគីវ។

ក្នុងអំឡុងពេលសន្និសីទសារព័ត៌មានមួយ លោក Zelenskyy បាននិយាយថា ជារួម ទឹកប្រាក់ ១៥ពាន់លានដុល្លារ ត្រូវបានទាមទារក្នុងមួយឆ្នាំ សម្រាប់បញ្ជីតម្រូវការអ៊ុយក្រែនជាអាទិភាព (ឬហៅថា PURL) ជាគំនិតផ្តួចផ្តើមមួយដែលសម្ព័ន្ធមិត្តណាតូផ្តល់មូលនិធិ សម្រាប់ការទិញអាវុធផលិតដោយសហរដ្ឋអាមេរិក សម្រាប់អ៊ុយក្រែន។

លោកបន្តថា កម្មវិធីនេះនៅតែខ្វះ "ប្រហែល ៨០០លានដុល្លារ" ទៀតសម្រាប់ឆ្នាំ២០២៥ បន្ទាប់ពីការប្រកាសរបស់ប្រទេសហូឡង់ អំពីការបរិច្ចាគចំនួន ៧០០លានអឺរ៉ូ កាលពីព្រឹកថ្ងៃចន្ទសប្ដាហ៍នេះ។ គួរឱ្យដឹងថា ចាប់តាំងពីគំនិតផ្តួចផ្តើម PURL របស់ណាតូ បានបង្កើតឡើងមក ប្រទេសចំនួន ២១ បានចូលរួម ដោយរួមចំណែកបានសរុបជាង ៤ពាន់លានដុល្លារអាមេរិក។

ទន្ទឹមនឹងនេះ អំឡុងពេលធ្វើដំណើរទៅកាន់ទីក្រុងព្រុចស៊ែល លោក Zelenskyy បានប្រាប់អ្នកយកព័ត៌មានថា កិច្ចពិភាក្សារបស់លោក ជាមួយមេដឹកនាំនៃចក្រភពអង់គ្លេស អាល្លឺម៉ង់ និងបារាំង នៅទីក្រុងឡុងដ្រ៍ មានវឌ្ឍនភាពល្អណាស់ ដោយបន្ថែមថា សំណើសន្តិភាពកែសម្រួលមួយ កំពុងត្រូវបានសម្រេចចុងក្រោយ ហើយនឹងត្រូវចែករំលែកជាមួយសហរដ្ឋអាមេរិក នៅថ្ងៃអង្គារ ទី៩ ខែធ្នូ នេះ៕