ប្រជាជនស៊ីរី បានប្រមូលផ្ដុំគ្នាកាលពីថ្ងៃចន្ទ (៨ ធ្នូ) ដើម្បីប្រារព្ធខួបលើកទីមួយនៃការផ្តួលរំលំរបបលោក Bashar al-Assad ជាមួយនឹងក្បួនយោធា និងការប្រារព្ធពិធីដ៏រីករាយនៅទីក្រុងធំៗ ខណៈប្រទេសដ៏បាក់បែកមួយនេះ កំពុងស្វះស្វែងរកស្ថិរភាព និងស្ដារឡើងវិញ បន្ទាប់ពីសង្គ្រាមអស់ជាច្រើនឆ្នាំ។

មេដឹកនាំស៊ីរីថ្មី គឺលោកប្រធានាធិបតី Ahmed al-Sharaa បានប្រាប់អ្នកគាំទ្រជាច្រើនថា រដ្ឋាភិបាលរបស់លោក បាន "ដាក់ចេញនូវចក្ខុវិស័យច្បាស់លាស់សម្រាប់ស៊ីរីថ្មី ជារដ្ឋដែលសម្លឹងឆ្ពោះទៅរកអនាគតដ៏ជោគជ័យ" ដោយហៅ ផែនការនេះថា ជាការបំបែកប្រវត្តិសាស្ត្រពី "ជំពូកដ៏ខ្មៅងងឹត"។

លោក Assad បានភៀសខ្លួនចេញពីស៊ីរីទៅកាន់រុស្ស៊ី កាលពីមួយឆ្នាំមុន នៅពេលដែលក្រុមឧទ្ទាមរបស់លោក Sharaa បានដណ្តើមកាន់កាប់ទីក្រុងដាម៉ាស បន្ទាប់ពីការវាយប្រហាររយៈពេល ៨ថ្ងៃពាសពេញប្រទេស ដោយបញ្ចប់ការគ្រប់គ្រងរបស់លោកអស់ជាង ១៣ឆ្នាំ ជាពេលដែលការបះបោរដ៏ធំមួយបានឈានដល់សង្រ្គាមស៊ីវិលដ៏ជូរចត់និងបង្ហូរឈាម។

នៅក្រុងអាឡិបប៉ូ ជាទីក្រុងធំដំបូងគេដែលធ្លាក់ក្នុងដៃកងកម្លាំងរបស់លោក Sharaa កាលពីឆ្នាំមុន រថយន្តជាច្រើនគ្រឿងបានជិះដង្ហែរតាមដងផ្លូវ ដោយចុចស៊ីផ្លេអបអរ ខណៈដែលអ្នកដំណើរគ្រវីទង់ជាតិថ្មីរបស់ស៊ីរីយ៉ាងរីករាយ៕