ការនាំចេញរបស់ប្រទេសចិនបានវិលត្រឡប់ទៅរកកំណើនវិញនៅក្នុងខែវិច្ឆិកាឆ្នាំ២០២៥នេះ បន្ទាប់ពីការធ្លាក់ចុះដែលមិននឹកស្មានដល់កាលពីខែមុន ទោះបីជាការដឹកជញ្ជូនទៅកាន់សហរដ្ឋអាមេរិកបានធ្លាក់ចុះជិត ២៩% ពីមួយឆ្នាំមុនក្នុងខែទីប្រាំបីជាប់ៗគ្នានៃការធ្លាក់ចុះពីរខ្ទង់ក៏ដោយ។  

ទិន្នន័យគយដែលចេញផ្សាយកាលពីថ្ងៃចន្ទដើមសប្ដាហ៍នេះបានបង្ហាញថា ការនាំចេញសរុបពីប្រទេសចិនមានចំនួន ៥,៩% ខ្ពស់ជាងឆ្នាំមុនក្នុងខែវិច្ឆិកា គិតជាប្រាក់ដុល្លារ មានចំនួន៣៣០,៣ ពាន់លានដុល្លារ ដែលល្អជាងការប៉ាន់ប្រមាណរបស់ក្រុមសេដ្ឋវិទូ។ នោះគឺជាងើបរឡើងពីការធ្លាក់ចុះ ១,១% ក្នុងខែតុលា។ 

ដោយបញ្ជាក់ពីគម្លាតកាន់តែធំរវាងការនាំចេញ និងការនាំចូលសរុប ទិន្នន័យគយបានបង្ហាញថា អតិរេកពាណិជ្ជកម្មរបស់ប្រទេសចិនសម្រាប់រយៈពេល ១១ ខែដំបូងបានហក់ឡើងលើសពី១សែនកោដិដុល្លារ ពោលគឺជិត១,០៨សែនកោដិដុល្លារ។ នោះជាកំណត់ត្រាខ្ពស់បំផុតសម្រាប់ឆ្នាំណាមួយ ហើយវាច្រើនជាងអតិរេក ៩៩២ពាន់លានដុល្លារនៅក្នុងឆ្នាំ២០២៤ ទាំងមូល ដោយផ្អែកលើទិន្នន័យផ្លូវការដែលចងក្រងដោយក្រុមហ៊ុនវិភាគទីផ្សារនិងហិរញ្ញវត្ថុ FactSet មានមូលដ្ឋាននៅអាមេរិក។   

ខណៈការនាំចេញពីប្រទេសចិនទៅកាន់សហរដ្ឋអាមេរិកបានធ្លាក់ចុះច្រើននៅឆ្នាំនេះ ការដឹកជញ្ជូនបានកើនឡើងទៅកាន់គោលដៅផ្សេងទៀត រួមទាំងអាស៊ីអាគ្នេយ៍ អាហ្វ្រិក អាមេរិកឡាទីន និងសហភាពអឺរ៉ុប៕