ក្រោយស្ថានការណ៍តានតឹងរវាងប្រទេសកម្ពុជា និងថៃ ដែលកំពុងតែកើនឡើងម្តងទៀត សហភាពអឺរ៉ុប ប្រទេសមហាអំណាច និងបណ្ដាប្រទេសជាមិត្តនានា បានចេញសេចក្ដីថ្លែងការណ៍បង្ហាញក្ដីព្រួយបារម្ភយ៉ាងខ្លាំង និងអំពាវនាវជាថ្មីដល់ប្រទេសទាំងពីរឱ្យគោរពតាមកិច្ចព្រមព្រៀងបទឈប់បាញ់ និងអនុវត្តការអត់ធ្មត់ជាអតិបរមា និងស្វែងរកដំណោះស្រាយដោយសន្តិវិធីតាមរយៈការសន្ទនាស្របតាមស្មារតីនៃសេចក្តីថ្លែងការណ៍រួមដែលធ្វើឡើងនៅថ្ងៃទី ២៦ ខែតុលា។
តាមសេចក្ដីថ្លែងការណ៍របស់សហភាពអ៊ឺរ៉ុបបានលើកឡើងថា ការប៉ះទង្គិចគ្នាដោយប្រដាប់អាវុធជាថ្មីរវាងកម្ពុជា-ថៃជាថ្មីនេះ គឺជាការកើនឡើងនូវអរិភាព។ សហភាពអឺរ៉ុបអំពាវនាវដល់ប្រទេសទាំងពីរឱ្យរក្សាភាពអត់ធ្មត់ខ្ពស់បំផុត និងវិលត្រឡប់ទៅរកសេចក្តីថ្លែងការណ៍រួមដែលបានចុះហត្ថលេខានៅថ្ងៃទី២៦ ខែតុលា ក៏ដូចជាវិធានការកសាងទំនុកចិត្តដែលបានកំណត់នៅក្នុងនោះ។ សហភាពអឺរ៉ុបត្រៀមខ្លួនរួចជាស្រេច ដើម្បីគាំទ្រវិធានការនានាដែលភាគីទាំងពីរបានព្រមព្រៀងគ្នា ក្នុងគោលបំណងកាត់បន្ថយភាពតានតឹង រួមទាំងសកម្មភាពមនុស្សធម៌ និងការបោសសំអាតមីនផងដែរ។
អ្នកស្រី ប្រ៊ីតហ្គេត វ៉កឃើរ (Bridgette Walker) ភារធារីស្ថានទូតសហរដ្ឋអាម៉េរិក ប្រចាំប្រទេសកម្ពុជា បានអំពាវនាវឱ្យរដ្ឋាភិបាលកម្ពុជា និងថៃ ត្រូវតែងាកទៅគោរព និងអនុវត្តតាមកិច្ច ព្រមព្រៀងសន្តិភាពទីក្រុងកូឡាឡាំពួរ ដែលមានលោកប្រធានាធិបតី Donald Trump ធ្វើជាសាក្សី កាលពីថ្ងៃទី២៦ ខែតុលា ឆ្នាំ២០២៥នេះផងដែរ។ ការអំពាវនាវនេះត្រូវបានធ្វើឡើងក្នុងពិធីប្រារព្ធខួបលើកទី៧៥ឆ្នាំ នៃទំនាក់ទំនងមិត្តភាពរវាងកម្ពុជា និងសហរដ្ឋអាម៉េរិក នៅខេត្តសៀមរាប នៅរាត្រីថ្ងៃទី៨ ខែធ្នូ ឆ្នាំ២០២៥។ លោកស្រីបន្តថាអាម៉េរិក និងលោកស្រីផ្ទាល់ សូមសម្ដែងនូវការក្រៀមក្រំ និងរំលែកទុក្ខជាមួយពលរដ្ឋកម្ពុជា ដែល មានសមាជិកគ្រួសារបានស្លាប់ និងរងរបួសដោយសារតែការវាយប្រហាររបស់ទាហានថៃនេះ។
ចំណែករដ្ឋាភិបាលបារំាង ក៏បង្ហាញក្ដីព្រួយបារម្ភចំពោះភាពតានតឹង ដែលកើតមានឡើងជាសាថ្មីរវាងកម្ពុជា-ថៃ ហើយដែលបង្កឱ្យមានជនរងគ្រោះថ្មីៗ។ បារំាងអំពាវនាវឱ្យមានការគោរពពេញលេញ និងការអនុវត្តជាក់ស្តែងនូវបទឈប់បាញ់ចុះថ្ងៃទី២៨ ខែកក្កដា ឆ្នាំ២០២៥ និងសេចក្តីថ្លែងការណ៍រួមធ្វើឡើងដោយនាយករដ្ឋមន្ត្រីនៃប្រទេសទាំងពីរ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ក្នុងអំឡុងកិច្ចប្រជុំកំពូលអាស៊ានលើកទី៤៧ នៅទីក្រុងគូឡាឡាំពួរ។
ជាមួយគ្នានេះ ឯកអគ្គរដ្ឋទូតចិនប្រចាំនៅកម្ពុជា ឯកឧត្តម វ៉ាង វិនប៊ីន (Wang Wenbin) តាមរយៈបណ្តាញសង្គមហ្វេកប៊ុក នៅយប់ថ្ងៃទី ៨ ធ្នូនេះ បានបង្ហោះសារចូលរួមរំលែកទុក្ខយ៉ាងក្រៀមក្រំបំផុត ជូនចំពោះជនរងគ្រោះក្នុងជម្លោះព្រំដែន។ជាសារ ធ្វើឡើងក្រោយពីយោធាថៃ បើកការវាយប្រហារឈ្លានពានកម្ពុជាជាលើកទី២។
ចំណែកលោក គីតាមីរ៉ា តូស៊ីហ៊ីរូ អ្នកនាំពាក្យក្រសួងការបរទេសជប៉ុន បានអំពាវនាវជាថ្មីម្តងទៀតដល់ប្រទេសកម្ពុជា និងថៃឱ្យគោរពតាមកិច្ចព្រមព្រៀងបទឈប់បាញ់ អនុវត្តការអត់ធ្មត់ជាអតិបរមា និងស្វែងរកដំណោះស្រាយដោយសន្តិវិធី។ រដ្ឋាភិបាលជប៉ុនមើលឃើញថា ភាពប្រសើរឡើងវិញ នៃទំនាក់ទំនងរវាងប្រទេសកម្ពុជា និងថៃមានសារៈសំខាន់ណាស់សម្រាប់ស្ថិរភាព និងការអភិវឌ្ឍក្នុងតំបន់ទាំងមូល។ អ្នកនាំពាក្យក្រសួងការបរទេសជប៉ុនបញ្ជាក់ថា ជប៉ុនកំពុងតែតាមដានដោយយកចិត្តដាក់នូវការវិវត្តនៃស្ថានភាពរវាងប្រទេសទាំងពីរដោយក្តីបារម្ភ ហើយប្រឆាំងនឹងសកម្មភាពណាមួយដែលអាចធ្វើឱ្យស្ថានការណ៍កាន់តែតានតឹងឡើង។
ជាមួយគ្នានេះ រដ្ឋាភិបាលអូស្ត្រាលី នៅព្រឹកថ្ងៃទី៩ ខែធ្នូ ឆ្នាំ២០២៥នេះ បានចេញសេចក្ដីថ្លែងការណ៍ បង្ហាញការព្រួយបារម្ភយ៉ាងខ្លាំងចំពោះការកើនឡើងនៃភាពតានតឹងនៅតាមបណ្តោយព្រំដែនកម្ពុជា-ថៃ និងរបាយការណ៍នៃការបាត់បង់ជីវិតទាំងជនស៊ីវិល និងយោធានេះផងដែរ។ អូស្ត្រាលីបានអំពាវនាវឱ្យភាគីទាំងពីរគោរពតាមកិច្ចព្រមព្រៀងបទឈប់បាញ់ថ្ងៃទី ២៨ ខែកក្កដា អនុវត្តការអត់ធ្មត់ជាអតិបរមា និងចាត់វិធានការជាបន្ទាន់ដើម្បីបន្ថយភាពតានតឹង។
រីឯរដ្ឋាភិបាលវៀតណាមបានសម្តែងការព្រួយបារម្ភយ៉ាងខ្លាំងបន្ទាប់ពីថៃ បានបើកការវាយប្រហារមកលើប្រទេសកម្ពុជាសារជាថ្មីម្តងទៀតជាមួយសព្វាវុធធន់ធ្ងន់ជាច្រើនប្រភេទ ឆ្លើយតបទៅនឹងសំណួររបស់កាសែត VietNamNet អ្នកនាំពាក្យក្រសួងការបរទេស លោកស្រី Pham Thu Hang បានមានប្រសាសន៍ថា “វៀតណាមមានការព្រួយបារម្ភយ៉ាងខ្លាំងចំពោះភាពតានតឹងដែលកំពុងបន្តរវាងកម្ពុជា និងថៃ”នេះ។ លោកស្រីថ្លែងថា ក្នុងនាមជាប្រទេសជិតខាង និងជាសមាជិកអាស៊ានវៀតណាមអំពាវនាវឱ្យភាគីទាំងពីរអនុវត្តការអត់ធ្មត់អតិបរមា ជៀសវាងការប្រើប្រាស់កម្លាំង អនុវត្តកិច្ចព្រមព្រៀងឈប់បាញ់ឱ្យបានពេញលេញ និងបន្តការសន្ទនា ដើម្បីដោះស្រាយជម្លោះដោយសន្តិវិធី៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
